[455] Idha pana bhikkhave bhikkhu dve saṅghādisesā āpattiyo āpajjati dvemāsapaṭicchannāyo ekā āpatti nibbematikapaṭicchannā ekā āpatti vematikapaṭicchannā . so saṅghaṃ tāsaṃ āpattīnaṃ dvemāsapaṭicchannānaṃ dvemāsaparivāsaṃ yācati . tassa saṅgho tāsaṃ āpattīnaṃ dvemāsapaṭicchannānaṃ dvemāsaparivāsaṃ deti . Tassa parivasantassa añño bhikkhu āgacchati bahussuto āgatāgamo dhammadharo vinayadharo mātikādharo paṇḍito viyatto medhāvī lajjī kukkuccako sikkhākāmo . so evaṃ vadeti kiṃ ayaṃ āvuso bhikkhu āpanno kissāyaṃ bhikkhu parivasatīti. {455.1} Te evaṃ vadenti ayaṃ āvuso bhikkhu dve saṅghādisesā āpattiyo āpajji dvemāsapaṭicchannāyo ekā āpatti nibbematikapaṭicchannā ekā āpatti vematikapaṭicchannā so saṅghaṃ tāsaṃ āpattīnaṃ dvemāsapaṭicchannānaṃ dvemāsaparivāsaṃ yāci tassa saṅgho tāsaṃ āpattīnaṃ dvemāsapaṭicchannānaṃ dvemāsaparivāsaṃ adāsi tāyo ayaṃ āvuso bhikkhu āpanno tāsāyaṃ bhikkhu parivasatīti . so evaṃ vadeti Yāyaṃ āvuso āpatti nibbematikapaṭicchannā dhammikaṃ tassā āpattiyā parivāsadānaṃ dhammatā rūhati yā ca khvāyaṃ āvuso āpatti vematikapaṭicchannā adhammikaṃ tassā āpattiyā parivāsadānaṃ adhammatā na rūhati etissā āvuso āpattiyā bhikkhu mānattārahoti.