[463] Idha pana bhikkhave bhikkhu dve saṅghādisesā āpattiyo āpajjati dvemāsapaṭicchannāyo eko māso jānapaṭicchanno eko māso ajānapaṭicchanno . so saṅghaṃ dvinnaṃ āpattīnaṃ dvemāsapaṭicchannānaṃ dvemāsaparivāsaṃ yācati . tassa saṅgho dvinnaṃ āpattīnaṃ dvemāsapaṭicchannānaṃ dvemāsaparivāsaṃ deti . tassa parivasantassa añño bhikkhu āgacchati bahussuto āgatāgamo dhammadharo vinayadharo mātikādharo paṇḍito viyatto medhāvī lajjī kukkuccako sikkhākāmo . so evaṃ vadeti kiṃ ayaṃ āvuso bhikkhu āpanno kissāyaṃ bhikkhu parivasatīti . te evaṃ vadenti ayaṃ āvuso bhikkhu dve saṅghādisesā āpattiyo āpajji dvemāsapaṭicchannāyo eko māso jānapaṭicchanno eko māso ajānapaṭicchanno so saṅghaṃ dvinnaṃ āpattīnaṃ dvemāsapaṭicchannānaṃ dvemāsaparivāsaṃ yāci tassa saṅgho dvinnaṃ āpattīnaṃ dvemāsapaṭicchannānaṃ dvemāsaparivāsaṃ adāsi tāyo ayaṃ āvuso bhikkhu āpanno tāsāyaṃ bhikkhu parivasatīti . so evaṃ vadeti yvāyaṃ āvuso māso jānapaṭicchanno dhammikaṃ tassa māsassa parivāsadānaṃ dhammatā rūhati yo ca khvāyaṃ āvuso māso ajānapaṭicchanno adhammikaṃ tassa māsassa parivāsadānaṃ adhammatā na rūhati etassa 1- @Footnote: 1 Ma. ekassa. evamuparipi. Āvuso māsassa bhikkhu mānattārahoti.

[464] Idha pana bhikkhave bhikkhu dve saṅghādisesā āpattiyo āpajjati dvemāsapaṭicchannāyo eko māso saramānapaṭicchanno eko māso asaramānapaṭicchanno . so saṅghaṃ dvinnaṃ āpattīnaṃ dvemāsapaṭicchannānaṃ dvemāsaparivāsaṃ yācati . tassa saṅgho dvinnaṃ āpattīnaṃ dvemāsapaṭicchannānaṃ dvemāsaparivāsaṃ deti . tassa parivasantassa añño bhikkhu āgacchati bahussuto āgatāgamo dhammadharo vinayadharo mātikādharo paṇḍito viyatto medhāvī lajjī kukkuccako sikkhākāmo . so evaṃ vadeti kiṃ ayaṃ āvuso bhikkhu āpanno kissāyaṃ bhikkhu parivasatīti. {464.1} Te evaṃ vadenti ayaṃ āvuso bhikkhu dve saṅghādisesā āpattiyo āpajji dvemāsapaṭicchannāyo eko māso saramānapaṭicchanno eko māso asaramānapaṭicchanno so saṅghaṃ dvinnaṃ āpattīnaṃ dvemāsapaṭicchannānaṃ dvemāsaparivāsaṃ yāci tassa saṅgho dvinnaṃ āpattīnaṃ dvemāsapaṭicchannānaṃ dvemāsaparivāsaṃ adāsi tāyo ayaṃ āvuso bhikkhu āpanno tāsāyaṃ bhikkhu parivasatīti . so evaṃ vadeti yvāyaṃ āvuso māso saramānapaṭicchanno dhammikaṃ tassa māsassa parivāsadānaṃ dhammatā rūhati yo ca khvāyaṃ āvuso māso asaramānapaṭicchanno adhammikaṃ tassa māsassa parivāsadānaṃ adhammatā na rūhati etassa āvuso māsassa bhikkhu mānattārahoti.