[499] Idha pana bhikkhave bhikkhu abbhānāraho antarā sambahulā saṅghādisesā āpattiyo āpajjati parimāṇāyo appaṭicchannāyo . So bhikkhu mūlāya paṭikassitabbo.

[500] Idha pana bhikkhave bhikkhu abbhānāraho antarā sambahulā saṅghādisesā āpattiyo āpajjati parimāṇāyo paṭicchannāyo . So bhikkhu mūlāya paṭikassitabbo yathāpaṭicchannānañcassa āpattīnaṃ purimāya āpattiyā samodhānaparivāso dātabbo.

[501] Idha pana bhikkhave bhikkhu abbhānāraho antarā sambahulā Saṅghādisesā āpattiyo āpajjati parimāṇāyo paṭicchannāyopi appaṭicchannāyopi . so bhikkhu mūlāya paṭikassitabbo yathāpaṭicchannānañcassa āpattīnaṃ purimāya āpattiyā samodhānaparivāso dātabbo.

[502] Idha pana bhikkhave bhikkhu abbhānāraho antarā sambahulā saṅghādisesā āpattiyo āpajjati aparimāṇāyo appaṭicchannāyo . So bhikkhu mūlāya paṭikassitabbo.