[511] Idha pana bhikkhave bhikkhu sambahulā saṅghādisesā āpattiyo āpajjitvā paṭicchādetvā vibbhamati . so puna upasampanno tā āpattiyo chādeti . tassa bhikkhave bhikkhuno purimasmiñca pacchimasmiñca āpattikkhandhe yathāpaṭicchanne parivāsaṃ datvā mānattaṃ dātabbaṃ.

[512] Idha pana bhikkhave bhikkhu sambahulā saṅghādisesā āpattiyo āpajjati . tassa honti āpattiyo paṭicchannāyopi appaṭicchannāyopi. So vibbhamitvā puna upasampanno yā āpattiyo pubbe chādesi tā āpattiyo pacchā na chādeti yā āpattiyo pubbe na chādesi tā āpattiyo pacchā na chādeti . tassa bhikkhave bhikkhuno purimasmiṃ āpattikkhandhe yathāpaṭicchanne parivāsaṃ datvā mānattaṃ dātabbaṃ.

[513] Idha pana bhikkhave bhikkhu sambahulā saṅghādisesā āpattiyo āpajjati . tassa honti āpattiyo paṭicchannāyopi appaṭicchannāyopi. So vibbhamitvā puna upasampanno yā āpattiyo pubbe chādesi tā āpattiyo pacchā na chādeti yā āpattiyo pubbe na chādesi tā āpattiyo pacchā chādeti . tassa bhikkhave bhikkhuno purimasmiñca pacchimasmiñca āpattikkhandhe yathāpaṭicchanne parivāsaṃ datvā mānattaṃ dātabbaṃ.

[514] Idha pana bhikkhave bhikkhu sambahulā saṅghādisesā āpattiyo āpajjati . tassa honti āpattiyo paṭicchannāyopi appaṭicchannāyopi. So vibbhamitvā puna upasampanno yā āpattiyo pubbe chādesi tā āpattiyo pacchā chādeti 1- yā āpattiyo pubbe na chādesi tā āpattiyo pacchā na chādeti 2- . tassa bhikkhave bhikkhuno purimasmiñca pacchimasmiñca āpattikkhandhe yathāpaṭicchanne parivāsaṃ datvā mānattaṃ dātabbaṃ.