[523] Idha pana bhikkhave bhikkhu sambahulā saṅghādisesā āpattiyo āpajjati ekaccā āpattiyo sarati ekaccā āpattiyo na sarati yā āpattiyo sarati tā āpattiyo chādeti yā Āpattiyo na sarati tā āpattiyo na chādeti . so vibbhamitvā puna upasampanno yā āpattiyo pubbe saritvā chādesi tā āpattiyo pacchā saritvā chādeti yā āpattiyo pubbe asaritvā na chādesi tā āpattiyo pacchā saritvā chādeti . Tassa bhikkhave bhikkhuno purimasmiñca pacchimasmiñca āpattikkhandhe yathāpaṭicchanne parivāsaṃ datvā mānattaṃ dātabbaṃ.

[524] Idha pana bhikkhave bhikkhu sambahulā saṅghādisesā āpattiyo āpajjati ekaccāsu āpattīsu nibbematiko ekaccāsu āpattīsu vematiko yāsu āpattīsu nibbematiko tā āpattiyo chādeti yāsu āpattīsu vematiko tā āpattiyo na chādeti . so vibbhamitvā puna upasampanno yā āpattiyo pubbe nibbematiko chādesi tā āpattiyo pacchā nibbematiko na chādeti yā āpattiyo pubbe vematiko na chādesi tā āpattiyo pacchā nibbematiko na chādeti . tassa bhikkhave bhikkhuno purimasmiṃ āpattikkhandhe yathāpaṭicchanne parivāsaṃ datvā mānattaṃ dātabbaṃ.

[525] Idha pana bhikkhave bhikkhu sambahulā saṅghādisesā āpattiyo āpajjati ekaccāsu āpattīsu nibbematiko ekaccāsu āpattīsu vematiko yāsu āpattīsu nibbematiko tā āpattiyo chādeti yāsu āpattīsu vematiko tā āpattiyo na chādeti . so vibbhamitvā puna upasampanno yā āpattiyo pubbe nibbematiko Chādesi tā āpattiyo pacchā nibbematiko na chādeti yā āpattiyo pubbe vematiko na chādesi tā āpattiyo pacchā nibbematiko chādeti . tassa bhikkhave bhikkhuno purimasmiñca pacchimasmiñca āpattikkhandhe yathāpaṭicchanne parivāsaṃ datvā mānattaṃ dātabbaṃ.

[526] Idha pana bhikkhave bhikkhu sambahulā saṅghādisesā āpattiyo āpajjati ekaccāsu āpattīsu nibbematiko ekaccāsu āpattīsu vematiko yāsu āpattīsu nibbematiko tā āpattiyo chādeti yāsu āpattīsu vematiko tā āpattiyo na chādeti . so vibbhamitvā puna upasampanno yā āpattiyo pubbe nibbematiko chādesi tā āpattiyo pacchā nibbematiko chādeti yā āpattiyo pubbe vematiko na chādesi tā āpattiyo pacchā nibbematiko na chādeti . tassa bhikkhave bhikkhuno purimasmiñca pacchimasmiñca āpattikkhandhe yathāpaṭicchanne parivāsaṃ datvā mānattaṃ dātabbaṃ.