{๓๐๕} อสฺสตรีหิ ยุตฺตา รถาติ อสฺสตรีรถา ฯ อามุตฺตมณิกุณฺฑลาติ อามุตฺตมณิกุณฺฑลานิ ฯ ปรินิพฺพุโตติ กิเลสูปธิขนฺธูปธีนํ อภาเวน สีติภูโต นิรูปธีติ วุจฺจติ ฯ สพฺพา อาสตฺติโย เฉตฺวาติ รูปาทีสุ วา วิสเยสุ สพฺพภเวสุ วา ปตฺถนาโย ฉินฺทิตฺวา ฯ วิเนยฺย หทเย ทรนฺติ จิตฺเต กิเลสทรถํ วิเนตฺวา ฯ เวยฺยายิกนฺติ วยกรณํ วุจฺจติ ฯ {๓๐๗} อาเทยฺยวาโจติ ตสฺส วจนํ พหุชเนหิ อาทาตพฺพํ โสตพฺพํ มญฺเญตีติ อตฺโถ ฯ อาราเม อกํสูติ เย สธนา เต อตฺตโน ธเนน อกํสุ เย มนฺทธนา เจว อธนา จ เตสํ ธนํ อทาสิ ฯ อิติ โส สตสหสฺสกหาปเณ สตสหสฺสคฺฆนิกญฺจ ภณฺฑํ ทตฺวา ปญฺจจตฺตาฬีสโยชนิเกสุ อทฺธาเนสุ โยชเน โยชเน วิหารปติฏฺฐานํ กตฺวา สาวตฺถึ อคมาสิ ฯ โกฏิสนฺถรํ สนฺถราเปสีติ กหาปณโกฏิยา โกฏึ ปฏิปาเทตฺวา สนฺถริตฺวา เย ตตฺถ รุกฺขา วา โปกฺขรณิโย วา เตสํ ปริกฺเขปปฺปมาณํ คเหตฺวา อญฺญตรสฺมึ

ฐาเน สนฺถเรตฺวา อทาสิ ฯ เอวมสฺส อฏฺฐารสโกฏิกํ เอกํ นิธานํ ปริกฺขยํ อคมาสิ ฯ กุมารสฺส เอตทโหสีติ คหปติโน เอวํ พหุธนํ จชนฺตสฺสาปิ มุขสฺส วิปฺปสนฺนาการํ ทิสฺวา เอตํ อโหสิ ฯ โกฏฺฐกํ มาเปสีติ สตฺตภูมิกํ ทฺวารโกฏฺฐกปาสาทํ มาเปสิ ฯ

อถโข อนาถปิณฺฑิโก คหปติ เชตวเน วิหาเร การาเปสิ ฯ ฯเปฯ มณฺฑเป การาเปสีติ อปราหิปิ อฏฺฐารสหิ โกฏีหิ เอเต วิหาราทโย การาเปสิ อฏฺฐกรีสปฺปมาณาย ภูมิยา ฯ วิปสฺสิสฺส หิ ภควโต ปุนพฺพสุมิตฺโต คหปติ โยชนปฺปมาณํ ภูมึ สุวณฺณิฏฺฐกสนฺถเรน จ กีณิตฺวา วิหารํ การาเปสิ ฯ สิขิสฺส สิริวฑฺโฒ คหปติ ติคาวุตปฺปมาณํ สุวณฺณยฏฺฐิสนฺถเรน ฯ เวสฺสภุสฺส โสตฺถิโช คหปติ อฑฺฒโยชนปฺปมาณํ สุวณฺณผาลสนฺถเรน ฯ กกุสนฺธสฺส อจฺจุโต คหปติ คาวุตปฺปมาณํ สุวณฺณหตฺถิปทสนฺถเรน ฯ โกนาคมนสฺส อุคฺโค คหปติ อฑฺฒคาวุตปฺปมาณํ สุวณฺณิฏฺฐก- สนฺถเรน ฯ กสฺสปสฺส สุมงฺคโล คหปติ วีสติอุสภปฺปมาณํ สุวณฺณกจฺฉปสนฺถเรน ฯ อมฺหากํ ภควโต สุทตฺโต คหปติ อฏฺฐกรีสปฺปมาณํ ภูมึ กหาปณสนฺถเรน กีณิตฺวา วิหารํ การาเปสีติ ฯ เอวํ อนุปุพฺเพน ปริหายนฺติ สมฺปตฺติโยติ อลเมว สพฺพสมฺปตฺตีสุ วิรชฺชิตุํ อลํ วิมุจฺจิตุนฺติ ฯ