ปุราณโปตฺถเก ปน คนฺเธติ ทิสฺสติ ฯ น ลกฺเขตีติ อลกฺขิโก น ชานาตีติ อตฺโถ ฯ อหํ ปาปกมฺมํ กโรมีติ น ชานาติ ฯ น สลฺลกฺเขตพฺโพติ อลกฺขิโก น ปสฺสิตพฺโพติ อตฺโถ ฯ {๓๔๓} ติกโภชนนฺติ เอตฺถ ตีหิ ชเนหิ ภุญฺชิตพฺพโภชนํ ฯ ตํ ปญฺญาเปสฺสามีติ ตํ อนุชานิสฺสามิ ฯ คณโภชเน ปน ยถาธมฺโม กาเรตพฺโพ ฯ กปฺปนฺติ อายุกปฺปํ ฯ พฺรหฺมปุญฺญนฺติ เสฏฺฐปุญฺญํ ฯ กปฺปํ สคฺคมฺหีติ อายุกปฺปเมว ฯ {๓๔๔} อถโข เทวทตฺโต สงฺฆํ ภินฺทิตฺวาติ โส กิร เอวํ สลากํ คาเหตฺวา ตตฺเถว อาเวณิกํ อุโปสถํ กตฺวา คโต เตเนตํ วุตฺตํ ฯ {๓๔๕} ปิฏฺฐิ เม อาคิลายตีติ จิรํ นิสชฺชาย เวทนาติกฺขตฺตา พาธติ ฯ ตมหํ อายมิสฺสามีติ ตํ อหํ ปสาริสฺสามิ ฯ อาเทสนาปาฏิหาริยานุสาสนี นาม เอวํปิ เต มโน ตถาปิ เต มโนติ เอวํ นรสฺส จิตฺตํ ชานิตฺวา ตทนุรูปา ธมฺมเทสนา ฯ {๓๔๖} มมานุกุพฺพนฺติ มมานุกิริยํ กุรุมาโน ฯ กปโณติ ทุกฺขิโต ฯ มหาวราหสฺสาติ มหานาคสฺส ฯ มหึ วิกุพฺพโตติ ปฐวึ ปทาเลนฺตสฺส ฯ ภึสํ ฆสานสฺสาติ ภึสํ ขาทนฺตสฺส ฯ นทีสุ ชคฺคโตติ เอตฺถ โส กิร หตฺถินาโค สายณฺหสมยํ ตํ นทีนามิกํ โปกฺขรณึ โอคาเหตฺวา กีฬนฺโต สพฺพรตฺตึ วีตินาเมสิ ชาคริกํ กโรติ ฯ เตน วุตฺตํ นทีสุ ชคฺคโตติ ฯ {๓๔๗} สุตาติ โสตา ฯ อสนฺทิทฺโธ จ อกฺขาตีติ นิสฺสนฺเทโห หุตฺวา อกฺขาตา อนุสนฺธิวเสน โยเชตฺวา ฯ {๓๕๐} อปาเย นิพฺพตฺติสฺสตีติ อาปายิโก ฯ เอวํ เนรยิโก ฯ กปฺปํ ฐสฺสตีติ กปฺปฏฺโฐ ฯ อิทานิ พุทฺธสหสฺเสนาปิ ติกิจฺฉิตุํ น สกฺกาติ อเตกิจฺโฉ ฯ

มา ชาตุ โกจิ โลกสฺมินฺติ มา กทาจิปิ โกจิ สตฺโต โลกสฺมึ ฯ อุปปชฺชถาติ อุปฺปชฺชถ ฯ ชลํว ยสสา อฏฺฐาติ ยสสา ชลนฺโต วิยฏฺฐิโต ฯ เทวทตฺโตติ เม สุตนฺติ อีทิโส เทวทตฺโตติ ภควตา สุตํปิ อตฺถิ ตเทว คเหตฺวา อิทํ วุตฺตํ ฯ โส ปมาทํ อนุจิณฺโณติ เอตฺถ ปมาทํ จินาตีติ อนุจิณฺโณ ฯ ปมาโท อปฺปหีโนติ อตฺโถ ฯ อาสชฺช นนฺติ ปาปเกน จิตฺเตน ปตฺวา วิเหเฐตฺวาติ วา อตฺโถ ฯ อวีจินิรยํ ปตฺโตติ อิทํ ปน อาสึสายํ อตีตวจนํ ฯ เภสฺมาติ ภยานโก ฯ {๓๕๑} เอกโต อุปาลิ เอโกติ ธมฺมวาทิปกฺเข เอโก ฯ เอกโต เทฺวติ อธมฺมวาทิปกฺเข เทฺว ฯ จตุตฺโถ อนุสาเวติ สลากํ คาเหตีติ สงฺฆํ ภินฺทิสฺสามีติ อธมฺมวาทิจตุตฺโถ หุตฺวา ฯ อนุสาเวตีติ อนุนยนฺโต สาเวติ ฯ น ตุมฺหากํเยว นรกภยํ อตฺถิ อมฺหากํปิ อตฺถิ น อมฺหากํปิ อวีจิมคฺโค ปิทหิโต น มยํ อกุสลานํ ภายาม ยทิ หิ อยํ อธมฺโม อยํ อวินโย อิทํ อสตฺถุสาสนํ วา ภเวยฺย น มยํ คณฺเหยฺยามาติอาทินา นเยน อธมฺมํ ธมฺโมติ เอวํ อฏฺฐารส เภทกรวตฺถูนิ สาเวตีติ อตฺโถ ฯ สลากํ คาเหตีติ เอวํ อนุสาเวตฺวา ปน อิทํ คณฺหถ อิทํ โรเจถาติ วทนฺโต สลากํ คาเหติ ฯ เอกโต อุปาลิ เทฺว โหนฺตีติอาทีสุปิ เอเสว นโย ฯ เอวํ โข อุปาลิ สงฺฆราชิ เจว โหติ สงฺฆเภโท จาติ เอวํ โหติ น ปน เอตฺตาวตา สงฺโฆ ภินฺโน โหติ ฯ