{๓๗๓} อาจมนวตฺถุสฺมึ ฯ สติ อุทเกติ เอตฺถ สเจ อุทกํ อตฺถิ ปฏิจฺฉนฺนฏฺฐานํ ปน นตฺถิ ภาชเนน อุทกํ นีหริตฺวา อาจมิตพฺพํ ฯ ภาชเน อสติ ปตฺเตน นีหริตพฺพํ ฯ ปตฺเตปิ อสติ อสนฺตํ นาม โหติ ฯ อิทํ อติวิวฏํ ปุรโต อญฺญํ อุทกํ ภวิสฺสตีติ คตสฺส อุทกํ อลภนฺตสฺเสว ภิกฺขาจารเวลา โหติ กฏฺเฐน วา เกนจิ วา ปุญฺฉิตฺวา คนฺตพฺพํ ฯ ภุญฺชิตุํปิ อนุโมทนํปิ กาตุํ วฏฺฏติ ฯ อาคตปฏิปาฏิยาติ วจฺจกุฏิยํ ปสฺสาวฏฺฐาเน นหานติฏฺเฐติ ตีสุปิ อาคตปฏิปาฏิเยว ปมาณํ ฯ

{๓๗๔} วจฺจกุฏิวตฺเต ฯ น ทนฺตกฏฺฐํ ขาทนฺเตนาติ อยํ วจฺจกุฏิยาปิ อวจฺจกุฏิยาปิ สพฺพตฺเถว ปฏิกฺเขโป ฯ น ผรุเสน กฏฺเฐนาติ ผาลิตกฏฺเฐน วา ขเรน วา คณฺฐิเกน วา กณฺฏเกน วา สุสิเรน วา ปูตินา วา น อวเลขิตพฺพํ ฯ อวเลขนกฏฺฐํ ปน อคเหตฺวา ปวิฏฺฐสฺส อาปตฺติ นตฺถิ ฯ น อาจมนสราวเกติ สพฺพสาธารณฏฺฐานํ สนฺธาเยตํ วุตฺตํ ฯ ตตฺร หิ อญฺเญ อญฺเญ อาคจฺฉนฺติ ตสฺมา อุทกํ น เสสิตพฺพํ ฯ ยํ ปน สงฺฆิเกปิ วิหาเร เอกเทเส นิวทฺธคมนตฺถาย กตฏฺฐานํ โหติ ปุคฺคลิกฏฺฐานํ วา ตสฺมึ วฏฺฏติ ฯ วิเรจนํ ปิวิตฺวา ปุนปฺปุนํ ปวิสนฺตสฺสาปิ วฏฺฏติเยว ฯ อูหตาติ โอหนิตา พหิ วจฺจมกฺขิตาติ อตฺโถ ฯ โธวิตพฺพาติ อุทกํ อาหริตฺวา โธวิตพฺพา ฯ อุทกํ อตฺถิ ภาชนํ นตฺถิ อสนฺตํ นาม โหติ ฯ ภาชนํ อตฺถิ อุทกํ นตฺถิ เอตํปิ อสนฺตํ ฯ อุภเย อสติ อสนฺตเมว ฯ กฏฺเฐน วา เกนจิ วา ปุญฺฉิตฺวา คนฺตพฺพํ ฯ เสสํ สพฺพตฺถ อุตฺตานเมวาติ ฯ

วตฺตกฺขนฺธกวณฺณนา นิฏฺฐิตา ฯ