ตตฺถ อุตุกาเล ตาว เกจิ อาคนฺตุกา ภิกฺขู ปุเรภตฺตํ อาคจฺฉนฺติ เกจิ ปจฺฉาภตฺตํ ปฐมยามํ มชฺฌิมยามํ ปจฺฉิมยามํ วา เย ยทา อาคจฺฉนฺติ เตสํ ตทาว ภิกฺขู อุฏฺฐาเปตฺวา เสนาสนํ ทาตพฺพํ ฯ อกาโล นาม นตฺถิ ฯ เสนาสนปญฺญาปเกน ปน ปณฺฑิเตน ภวิตพฺพํ ฯ เอกํ วา เทฺว วา มญฺจฏฺฐานานิ ฐเปตพฺพานิ ฯ สเจ วิกาเล เอโก วา เทฺว วา มหาเถรา อาคจฺฉนฺติ เต วตฺตพฺพา ภนฺเต อาทิโต ปฏฺฐาย อุฏฺฐาปิยมานา สพฺเพปิ ภิกฺขู อุพฺภณฺฑิกา ภวิสฺสนฺติ ตุมฺเห อมฺหากํ วสนฏฺฐาเน- เยว วสถาติ ฯ พหูสุ ปน อาคเตสุ วุฏฺฐาเปตฺวา ปฏิปาฏิยา ทาตพฺพํ ฯ สเจ เอเกกํ ปริเวณํ ปโหติ เอเกกํ ปริเวณํ ทาตพฺพํ ตตฺถ อคฺคิสาลาทีฆสาลามณฺฑลมาฬาทโย สพฺเพปิ ตสฺเสว ปาปุณนฺติ ฯ เอวํ อปฺปโหนฺเตสุ ปาสาทคฺเคน ทาตพฺพํ ฯ ปาสาเทสุ อปฺปโหนฺเตสุ โอวรกคฺเคน ทาตพฺพํ ฯ โอวรกคฺเคสุ อปฺปโหนฺเตสุ เสยฺยคฺเคน ทาตพฺพํ ฯ มญฺจฏฺฐาเน อปฺปโหนฺเต เอกปีฐกฏฺฐานวเสน ทาตพฺพํ ฯ ภิกฺขุโน ปน ฐิโตกาสมตฺตํ น คาเหตพฺพํ ฯ เอตํ หิ เสนาสนํ นาม น โหติ ฯ ปีฐกฏฺฐาเน ปน อปฺปโหนฺเต เอกํ มญฺจฏฺฐานํ วา ปีฐกฏฺฐานํ วา วาเรน วาเรน ภนฺเต วิสฺสมถาติ ติณฺณํ ชนานํ ทาตพฺพํ ฯ น หิ สกฺกา สีตสมเย สพฺพรตฺตึ อชฺโฌกาเส วสิตุํ ฯ มหาเถเรน ปฐมยามํ วิสฺสมิตฺวา นิกฺขมิตฺวา ทุติยตฺเถรสฺส วตฺตพฺพํ อาวุโส อิธ ปวิสาหีติ ฯ สเจ มหาเถโร นิทฺทาครุโก โหติ กาลํ น ชานาติ อุกฺกาสิตฺวา ทฺวารํ อาโกเฏตฺวา ภนฺเต กาโล ชาโต สีตํ อนุทหตีติ วตฺตพฺพํ ฯ เตน นิกฺขมิตฺวา โอกาโส ทาตพฺโพ ฯ อทาตุํ น ลภติ ฯ ทุติยตฺเถรานาปิ มชฺฌิมยามํ วิสฺสมิตฺวา ปุริมนเยเนว อิตรสฺส ทาตพฺพํ ฯ นิทฺทาครุโก วุตฺตนเยเนว วุฏฺฐาเปตพฺโพ ฯ เอวํ เอกรตฺตึ เอกมญฺจฏฺฐานํ ติณฺณํ ทาตพฺพํ ฯ ชมฺพูทีเป ปน เอกจฺเจ ภิกฺขู เสนาสนํ นาม มญฺจฏฺฐานํ วา ปีฐฏฺฐานํ วา กิญฺจิเทว กสฺสจิ สปฺปายํ โหติ กสฺสจิ อสปฺปายนฺติ อาคนฺตุกา วา โหนฺตุ มา วา เทวสิกํ เสนาสนํ คาเหนฺติ ฯ อยํ อุตุกาเล เสนาสนคาโห นาม ฯ

วสฺสาวาเส ปน อตฺถิ อาคนฺตุกวตฺตํ อตฺถิ อาวาสิกวตฺตํ ฯ ตตฺถ อาคนฺตุเกน ตาว สกฏฺฐานํ มุญฺจิตฺวา อญฺญตฺถ คนฺตฺวา วสิตุกาเมน วสฺสูปนายิกทิวสเมว ตตฺถ น คนฺตพฺพํ ฯ วสนฏฺฐานํ วา หิ ตตฺถ สมฺพาธํ ภเวยฺย ภิกฺขาจาโร วา น สมฺปชฺเชยฺย ฯ เตน น ผาสุกํ วิหเรยฺย ตสฺมา อิทานิ มาสมตฺเตน วสฺสูปนายิโก ภวิสฺสตีติ ตํ วิหารํ ปวิสิตพฺพํ ฯ ตตฺถ มาสมตฺตํ วสนฺโต สเจ อุทฺเทสตฺถิโก อุทฺเทสสมฺปตฺตึ สลฺลกฺเขตฺวา สเจ กมฺมฏฺฐานิโก กมฺมฏฺฐานสปฺปายํ สลฺลกฺเขตฺวา สเจ ปจฺจยตฺถิโก ปจฺจยลาภํ สลฺลกฺเขตฺวา อนฺโตวสฺเส สุขํ วสิสฺสติ ฯ สกฏฺฐานโต จ ตตฺถ คจฺฉนฺเตน น โคจรคาโม ฆเฏตพฺโพ น ตตฺถ มนุสฺสา วตฺตพฺพา ตุมฺเห นิสฺสาย สลากภตฺตาทีนิ วา ยาคุขชฺชกาทีนิ วา วสฺสาวาสิกํ วา นตฺถิ อยํ เจติยสฺส ปริกฺขาโร อยํ อุโปสถาคารสฺส อิทํ ตาลญฺเจว สูจิ จ สมฺปฏิจฺฉถ ตุมฺหากํ วิหารนฺติ ฯ เสนาสนมฺปน ปฏิชคฺคิตฺวา ทารุภณฺฑมตฺติกาภณฺฑานิ ปฏิสาเมตฺวา คมิยวตฺตํ ปูเรตฺวา คนฺตพฺพํ ฯ เอวํ คจฺฉนฺเตนาปิ ทหเรหิ ปตฺตจีวรภณฺฑกาทโย อุกฺขิปาเปตฺวา เตลนาฬิกตฺตรทณฺฑาทีนิ คาหาเปตฺวา ฉตฺตํ ปคฺคยฺห อตฺตานํ ทสฺเสนฺเตน คามทฺวาเรเนว น คนฺตพฺพํ ฯ ปฏิจฺฉนฺเนน อฏวิมคฺเคน คนฺตพฺพํ ฯ อฏวิมคฺเค อสติ คุมฺพาทีนิ มทฺทนฺเตน น คนฺตพฺพํ ฯ คมิยวตฺตํ ปน ปูเรตฺวา วิตกฺกํ ฉินฺทิตฺวา สุทฺธจิตฺเตน คมนวตฺเตเนว คนฺตพฺพํ ฯ สเจ ปน คามทฺวาเรน มคฺโค โหติ ฯ คจฺฉนฺตํ ปน สปริวารํ ทิสฺวา มนุสฺสา อมฺหากํ เถโร วิยาติ อุปธาวิตฺวา กุหึ ภนฺเต สพฺเพ ปริกฺขาเร คเหตฺวา คจฺฉถาติ วทนฺติ ฯ เตสุ เจ เอโก เอวํ วทติ วสฺสูปนายิกกาโล นามายํ ยตฺถ อนฺโตวสฺเส นิพทฺธภิกฺขาจาโร ภณฺฑปฏิจฺฉาทนญฺจ ลพฺภติ ตตฺถ ภิกฺขู คจฺฉนฺตีติ ฯ ตสฺส เจ สุตฺวา เต มนุสฺสา ภนฺเต อิมสฺมึปิ คาเม ชโน ภุญฺชติ เจว นิวาเสติ จ มา อญฺญตฺถ คจฺฉถาติ วตฺวา มิตฺตามจฺเจ ปกฺโกสาเปตฺวา สพฺเพ สมนฺตยิตฺวา วิหาเร นิพทฺธภตฺตญฺจ สลากภตฺตาทีนิ จ วสฺสาวาสิกญฺจ ฐเปตฺวา อิเธว ภนฺเต วสถาติ ยาจนฺติ ฯ สพฺพํ สาทิตุํ วฏฺฏติ ฯ สพฺพํเปตํ กปฺปิยญฺเจว อนวชฺชญฺจ ฯ กุรุนฺทิยํ ปน กุหึ คจฺฉถาติ วุตฺเต อสุกฏฺฐานนฺติ วตฺวา กสฺมา ตตฺถ คจฺฉถาติ วุตฺเตน การณํ อาจิกฺขิตพฺพนฺติ วุตฺตํ ฯ อุภยํ ปเนตํ สุทฺธจิตฺตตฺตาว อนวชฺชํ ฯ อิทํ อาคนฺตุกวตฺตํ นาม ฯ