{๓๑๙} อุปนนฺทวตฺถุสฺมึ ฯ ตตฺถ ตยา โมฆปุริส คหิตํ อิธ มุกฺกํ อิธ คหิตํ ตตฺร มุกฺกนฺติ เอตฺถ อยมตฺโถ ยํ ตยา ตตฺถ เสนาสนํ คหิตํ ตํ เต คณฺหนฺเตเนว อิธ มุกฺกํ โหติ ฯ อิธ ทานาหํ อาวุโส มุญฺจามีติ วทนฺเตน ปน ตํ ตตฺราปิ มุกฺกํ ฯ เอวํ ตฺวํ อุภยตฺถ ปริพาหิโรติ ฯ อยํ ปเนตฺถ วินิจฺฉโย ฯ คหเณน คหณํ ปฏิปฺปสฺสมฺภติ ฯ คหเณน อาลโย ปฏิปฺปสฺสมฺภติ ฯ อาลเยน คหณํ ปฏิปฺปสฺสมฺภติ ฯ อาลเยน อาลโย ปฏิปฺปสฺสมฺภติ ฯ กถํ ฯ อิเธกจฺโจ วสฺสูปนายิกทิวเส เอกสฺมึ วิหาเร เสนาสนํ คเหตฺวา สามนฺตวิหารํ คนฺตฺวา ตตฺราปิ คณฺหติ ตสฺส อิมินา คหเณน ปุริมํ คหณํ ปฏิปฺปสฺสมฺภติ ฯ อปโร อิธ วสิสฺสามีติ อาลยมตฺตํ กตฺวา สามนฺตวิหารํ คนฺตฺวา ตตฺเถว เสนาสนํ คณฺหติ ตสฺส อิมินา คหเณน ปุริโม อาลโย ปฏิปฺปสฺสมฺภติ ฯ เอโก อิธ วสิสฺสามีติ เสนาสนํ วา คเหตฺวา อาลยํ วา กตฺวา สามนฺตวิหารํ คนฺตฺวา ตตฺถ เสนาสนํ คณฺหติ อิเธวิทานิ วสิสฺสามีติ อาลยํ วา กโรติ อิจฺจสฺส อาลเยน วา คหณํ อาลเยน วา อาลโย ปฏิปฺปสฺสมฺภติ ฯ สพฺพตฺถ ปจฺฉิเม ปจฺฉิเม คหเณ วา อาลเย วา ติฏฺฐติ ฯ โย ปน เอกสฺมึ วิหาเร เสนาสนํ คเหตฺวา อญฺญสฺมึ วิหาเร วสิสฺสามีติ คจฺฉติ ตสฺส อุปจารสีมาติกฺกเม เสนาสนคาโห ปฏิปฺปสฺสมฺภติ ฯ ยทิ ปน สเจ ตตฺถ ผาสุํ ภวิสฺสติ วสิสฺสามิ โน เจ อาคมิสฺสามีติ คนฺตฺวา อผาสุกภาวํ ญตฺวา ปจฺฉา คจฺฉติ วฏฺฏติ ฯ