Pāṭimokkhaṭṭhapanakkhandhakavaṇṇanā

-------

{383} pāṭimokkhaṭṭhapanakkhandhake. Nandimukhiyā rattiyāti aruṇuṭṭhitakāle pītimukhā viya ratti khāyati. Tenāha nandimukhiyā rattiyāti. Antopūtinti antocittasantāne kilesapūtisabhāvena antopūti. Avassutanti kilesavassanavasena avassutaṃ. Kasambujātanti ākiṇṇadosatāya saṅkiliṭṭhajātaṃ. Yāva bāhāgahaṇāpi nāmāti aparisuddhā ānanda parisāti vacanaṃ sutvāyeva hi tena pakkamitabbaṃ siyā evaṃ apakkamitvā yāva bāhāgahaṇāpi nāma so moghapuriso āgamissati acchariyamidanti dasseti. {384} Na āyatakeneva papāto hotīti na paṭhamameva gambhīro anupubbena gambhīroti attho. Ṭhitadhammo velaṃ nātivattatīti vīcīnaṃ osakkanavaḍḍhanamariyādavelaṃ nātikkamati. Tīraṃ vāhetīti tīraṃ appeti ussādetīti attho. Aññāpaṭivedhoti arahattapaṭivedho. {385} Channamativassatīti āpattiṃ āpajjitvā paṭicchādento aññaṃ navaṃ āpattiṃ āpajjatīti idametaṃ sandhāya vuttaṃ. Vivaṭaṃ nātivassatīti āpattiṃ āpajjitvā vivaranto aññaṃ āpattiṃ āpajjatīti idametaṃ sandhāya vuttaṃ.

{386} Ṭhapitaṃ hoti pāṭimokkhanti ettha pure vā pacchā vā ṭhapitaṃpi aṭhapitaṃpi hoti khette ṭhapitameva pana ṭhapitaṃ hoti tasmā Suṇātu me bhante saṅgho ajja uposatho paṇṇaraso yadi saṅghassa pattakallaṃ saṅgho uposathaṃ kareyyāti ettha yāva rekāraṃ bhaṇati tāva ṭhapetabbaṃ idaṃ hi khettaṃ. Yakāre pana vutte ṭhapentena pacchā ṭhapitaṃ nāma hoti. Suṇātu meti anāraddheva ṭhapentena pure ṭhapitaṃ hoti. {387} Amūlikāya diṭṭhivipattiyā pāṭimokkhaṃ ṭhapeti akatāyāti tena puggalena sā vipatti katā vā hotu akatā vā pāṭimokkhaṭṭhapanakassa saññā amūlakavasena amūlakā hoti. Katākatāyāti katañca akatañca ubhayaṃ gahetvā vuttaṃ.