Saṅghabhedakkhandhakavaṇṇanā

{330} saṅghabhedakkhandhake. Abhiññātā abhiññātāti pākaṭā pākaṭā sakyakumārā nāma kāḷudāyippabhūtayo dasadūtā saddhiṃ parivārehi aññe ca bahū janā. Amhākanti amhesu. Amhākaṃ kulatoti vā vuttaṃ hoti. Gharāvāsatthaṃ anusissāmīti gharāvāse yaṃ kattabbaṃ taṃ jānāpessāmi. Atinetabbanti udakaṃ pavesetabbaṃ. Ninnetabbanti yathā udakaṃ sabbaṭṭhāne samaṃ hoti evaṃ kātabbaṃ. Niddāpetabbanti tiṇāni uddharitabbāni. Bhusikā uddharāpetabbāti sukhumapalālamissā dhaññā palālakāpi apanetabbā. Ophunāpetabbanti sukhumatiṇapalālakā pavāhanatthaṃ vātaṃ gāhetabbaṃ. Tenahi tvaññeva gharāvāsatthena upajānāhīti tvaññeva gharāvāsatthaṃ pajānāhi. Ahaṃ tayā yathāsukhaṃ pabbajāhīti ettha ahaṃ tayā saddhiṃ pabbajissāmīti sahāyasinehena sahasā vattukāmo hutvā puna rajjasirilobhena parikaḍḍhiyamānahadayo ahaṃ tayāti ettakameva vatvā sesaṃ vattuṃ nāsakkhīti evamattho veditabbo. {331} Nippātitāti nikkhāmitā. Mānassinoti mānassiyamānā. Mānanissitāti vuttaṃ hoti. Paradattavuttoti ettha paradattavuttattā paradattavutto. {332} Yassantarato na santi kopāti tatiyamaggena samūhatattā yassa citte kopā Na santi. Yasmā pana bhavoti sampatti vibhavoti vipatti tathā bhavoti vuḍḍhi vibhavoti hāni bhavoti sassato vibhavoti ucchedo bhavoti puññaṃ vibhavoti pāpaṃ vibhavoti ca abhavoti ca atthato ekamevetaṃ tasmā iti bhavābhavatañca vītivattoti ettha ca yā esā sampattivipattivuḍḍhihānisassatucchedapuññapāpavasena iti anekappakārā bhavābhavatā vuccati catūhipi maggehi yathāsambhavaṃ tena nayena taṃ iti bhavābhavatañca vītivattoti evamattho ca daṭṭhabbo. Nānubhavantīti na sampāpuṇanti tassa dassanaṃ devānaṃpi dullabhanti adhippāyo. {333} Ahimekhalikāyāti ahiṃ kaṭiyaṃ bandhitvā. Ucchaṅgeti aṅgesu. {334} Sammannatīti sammāneti. Yaṃ tumo karissatīti yaṃ so karissati. {336} Kheḷāsakoti ettha micchājīvena uppannapaccayā ariyehi vattabbā kheḷasadisā tathārūpe paccaye ayaṃ ajjhorahatīti katvā kheḷāsakoti bhagavatā vutto.