Vattakkhandhakavaṇṇanā

{357} vattakkhandhake. Idāni ārāmaṃ pavisissāmīti iminā upacārasīmasamīpaṃ dasseti tasmā upacārasīmaṃ patvā upāhanaomuñcanādi sabbaṃ kātabbaṃ. Gahetvāti upāhanā kattaradaṇḍena gahetvā. Paṭikkamantīti sannipatanti. Upāhanapuñchanacoḷakaṃ pucchitvā upāhanā puñchitabbāti katarasmiṃ ṭhāne upāhanā puñchanacoḷakanti āvāsike bhikkhū pucchitvā. Vissajjetabbanti attharitabbaṃ. Gocaro pucchitabboti gocaragāmo āsanne udāhu dūre kālasseva piṇḍāya caritabbaṃ udāhu divāti evaṃ bhikkhācāro pucchitabbo. Agocaro nāma micchādiṭṭhikānaṃ vā gāmo paricchinnabhikkho vā gāmo. Yattha ekassa vā dvinnaṃ vā bhikkhā diyyati sopi pucchitabbo. Pānīyaṃ pucchitabbaṃ paribhojanīyaṃ pucchitabbanti kiṃ imissā pokkharaṇiyā pānīyaṃyeva pivanti nahānādiparibhogaṃpi karontīti evaṃ pānīyañceva paribhojanīyañca pucchitabbaṃ. Kesuci ṭhānesu vāḷamigā vā amanusasā vā honti tasmā kaṃ kālaṃ pavisitabbaṃ kaṃ kālaṃ nikkhamitabbanti pucchitabbaṃ. Bahi ṭhitenāti nikkhamantassa ahino vā amanussassa vā maggaṃ disvā ṭhitena oloketabbo. Sace ussahati sodhetabboti yadi sakkoti sabbo vihāro Sodhetabbo asakkontena attano vasanokāso jaggitabbo. Sabbaṃ sodhetuṃ sakkontassa pana dassite vihārasodhanavatte vinicchayo mahākhandhake vuttanayeneva veditabbo.

{359} Āvāsikavatte. Āsanaṃ paññāpetabbanti evamādi sabbaṃ vuḍḍhatare āgate cīvarakammaṃ vā navakammaṃ vā ṭhapetvāpi kātabbaṃ. Cetiyaṅgaṇaṃ sammajjantena sammujjaniṃ nikkhipitvā tassa vattaṃ kātuṃ ārabhitabbaṃ. Paṇḍito ce hoti āgantuko sammajjāhi tāva āvuso cetiyaṅgaṇanti vakkhati. Gilānabhesajjaṃ karontena pana sace nātiāturo gilāno hoti bhesajjaṃ akatvā vattameva kātabbaṃ mahāgilānassa pana bhesajjameva kātabbaṃ. Paṇḍito ce hoti āgantuko karohi tāva bhesajjanti vakkhati. Pānīyena pucchantena sace sakiṃ ānītaṃ pānīyaṃ sabbaṃ pivati puna ānessāmīti pucchitabboyeva. Apica vījanena vījitabbo. Vījantena sakiṃ pādapiṭṭhiyaṃ vījitvā sakiṃ majjhe sakiṃ sīse vījitabbaṃ. Alaṃ hotūti vuttena mandataraṃ vījitabbaṃ. Puna alanti vuttena tato mandataraṃ vījitabbaṃ. Tatiyavāraṃ vuttena vījanī ṭhapetabbā. Pādāpissa dhovitabbā. Dhovitvā sace attano telaṃ atthi tena makkhetabbā. No ce atthi tassa santakena makkhetabbā. Upāhanapuñchanaṃ pana attano rucivasena kātabbaṃ. Teneva sace ussahatīti vuttaṃ. Tasmā upāhanā apuñchantassāpi anāpatti. Kattha mayhaṃ senāsanaṃ pāpuṇātīti pucchitena senāsanaṃ paññāpetabbaṃ. Etaṃ tumhākaṃ senāsanaṃ pāpuṇātīti evaṃ ācikkhitabbanti attho. Papphoṭetvā pattharituṃ pana vaṭṭatiyeva.