Navakassa vatte. Pānīyaṃ ācikkhitabbanti etaṃ pānīyaṃ gahetvā pivāhīti ācikkhitabbaṃ. Paribhojanīyepi eseva nayo. Sesaṃ purimasadisameva. Mahāāvāsepi hi attano santikaṃ sampattassa āgantukassa vattaṃ akātuṃ na labhati.

{360} Gamikavatte. Dārubhaṇḍanti senāsanakkhandhake vuttaṃ mañcapīṭhādi. Mattikābhaṇḍaṃpi rajanabhājanādi sabbaṃ tattha vuttappabhedameva. Taṃ sabbaṃ aggisālāya vā aññasmiṃ vā guttaṭṭhāne paṭisāmetvā gantabbaṃ. Anovassake pabbhārepi ṭhapetuṃ vaṭṭati. Senāsanaṃ āpucchitabbanti ettha yaṃ pāsāṇapiṭṭhiyaṃ vā pāsāṇatthamthesu vā katasenāsanaṃ yattha upacikā nārohanti taṃ anāpucchantassāpi anāpatti. Catūsu pāsāṇakesūtiādi upacikānaṃ uppattiṭṭhāne paṇṇasālādisenāsane kattabbākāradassanatthaṃ vuttaṃ. Appeva nāma aṅgānipi seyyunti ayaṃ ajjhokāse ṭhapitamhi ānisaṃso. Ovassakagehe pana tiṇesu ca mattikāpiṇḍesu ca uparipatantesu mañcapīṭhānaṃ aṅgānipi vinassanti.

{362} Anumodanavatthusmiṃ. Iddhaṃ ahosīti sampannaṃ ahosi. Catūhi pañcahīti saṅghatthere anumodanatthāya nisinne heṭṭhā paṭipāṭiyā catūhi nisīditabbaṃ. Anuthere nisinne mahātherena heṭṭhā ca tīhi nisīditabbaṃ. Pañcame nisinne upari catūhi nisīditabbaṃ. Saṅghattherena heṭṭhā daharabhikkhusmiṃ ajjhiṭṭhepi saṅghattherato paṭṭhāya catūhi nisīditabbameva. Sace pana anumodako bhikkhu gacchatha bhante āgametabbakiccaṃ natthīti vadati gantuṃ vaṭṭati. Mahātherena gacchāma āvuso gacchāmāti vutte gacchathāti vadati evaṃpi vaṭṭati. Bahigāme āgamissāmāti ābhogaṃ katvāpi bahigāmaṃ gantvā attano nissitake tumhe tassāgamanaṃ āgamethāti vatvāpi gantuṃ vaṭṭatiyeva. Sace pana manussā attanā rucitena ekena anumodanaṃ kārenti neva tassa anumodato āpatti na mahātherassa bhāro hoti. Upanisinnakathāyameva hi manussesu kathāpentesu thero āpucchitabbo. Mahātherena ca anumodanāya ajjhiṭṭhova āgametabboti idamettha lakkhaṇaṃ. Vaccitoti sañjātavacco vaccapīḷitoti adhippāyo.