{364} Bhattaggavatte. Antogāme vā hotu vihāre vā manussānaṃ parivesanaṭṭhānaṃ gacchantena cīvaraṃ pārupitvā kāyabandhanameva vaṭṭatīti aṭṭhakathāsu vuttaṃ. Na there bhikkhū anūpakhajjāti there bhikkhū atiallīyitvā na nisīditabbaṃ. Sace mahātherassa nisinnāsanena samakaṃ āsanaṃ hoti bahūsu āsanesu sati ekaṃ dve āsanāni ṭhapetvā nisīditabbaṃ. Bhikkhū gaṇetvā paññattāsanesu anisīditvā mahātherena nisīdāhīti vuttena nisīditabbaṃ. No ce mahāthero vadati idaṃ bhante āsanaṃ uccanti vattabbaṃ. Nisīdāhīti vutte nisīditabbaṃ. Sace pana evaṃ āpucchitepi na vadati nisīdantassa Anāpatti. Mahātherasseva āpatti. Navako hi evarūpe āsane anāpucchā nisīdanto āpajjati yathā thero āpucchito ananujānanto. Na saṅghāṭiṃ ottharitvāti na saṅghāṭiṃ avattharitvā nisīditabbaṃ. Ubhohi hatthehīti pattadhovanaudakaṃ sandhāya vuttaṃ. Dakkhiṇodakaṃ pana purato ādhārake pattaṃ ṭhapetvā gahetabbaṃ. Sādhukanti udakasaddaṃ akarontena. Sūpassa okāsoti yathā sūpassa okāso hoti evaṃ mattāya odano gahetabboti attho. Samakaṃ sampādehīti idaṃ na kevalaṃ sappiādīsu odanepi vattabbaṃ. Sappiādīsu pana yaṃ appaṃ hoti ekassa vā dvinnaṃ vā anurūpaṃ taṃ sabbesaṃ samakaṃ sampādehīti vutte manussānaṃ vihesā hoti tasmā tādisaṃ sakiṃ vā dvikkhattuṃ vā gahetvā sesaṃ na gahetabbaṃ. Na tāva therena bhuñjitabbanti idaṃ yaṃ paricchannabhikkhukaṃ bhattaggaṃ yattha manussā sabbesaṃ pāpetvā vanditukāmā honti taṃ sandhāya vuttaṃ. Yaṃ pana mahābhattaggaṃ hoti yattha ekasmiṃ padese bhuñjanti ekasmiṃ padese udakaṃ diyyati tattha yathāsukhaṃ bhuñjitabbaṃ. Na tāva therena udakanti idaṃ hatthadhovanaudakaṃ sandhāya vuttaṃ. Antarā pipāsitena pana gale vilaggāmisena vā pānīyaṃ pivitvā hatthā na dhovitabbā. Sace manussā dhovatha bhante pattañca hatthe cāti vadanti bhikkhū vā tumhe udakaṃ gaṇhathāti vadanti vaṭṭati. Nivattantenāti bhattaggato uṭṭhāya nivattantena saṅghena evaṃ nivattitabbanti Dasseti. Kathaṃ. Navakehīti sabbaṃ daṭṭhabbaṃ. Sambādhesu hi gharesu mahātherānaṃ nikkhamantokāso na hoti tasmā evaṃ vuttaṃ. Evaṃ nivattantehi pana navakehi gehadvāre ṭhatvā theresu nikkhamantesu paṭipāṭiyā gantabbaṃ. Sace pana mahātherā dūre nisinnā honti navakā antogehe therāsanato paṭṭhāya pāliyāeva nikkhamitabbaṃ. Kāyena kāyaṃ aghaṭentehi yathā antare manussā gantuṃ sakkonti evaṃ viralāya pāliyā gantabbaṃ.