{366} Piṇḍacārikavatte. Kammaṃ vā nikkhipantīti kappāsaṃ vā suppaṃ vā musalaṃ vā yaṃ gahetvā kammaṃ karonti ṭhitā vā nisinnā vā honti taṃ nikkhipanti. Na ca bhikkhādāyikāyāti itthī vā hotu puriso vā bhikkhādānasamaye mukhaṃ na oloketabbaṃ.

{368} Āraññakavatte. Senāsanā otaritabbanti vasanaṭṭhānato nikkhamitabbaṃ. Pattaṃ thavikāya pakkhipitvāti ettha sace bahigāme udakaṃ natthi antogāmeyeva bhattakiccaṃ katvā atha bahigāme atthi bahigāme bhattakiccaṃ katvā patto dhovitvā nirodakaṃ katvā thavikāya pakkhipitabbo. Paribhojanīyaṃ upaṭṭhāpetabbanti sace bhājanāni nappahonti pānīyameva paribhojanīyaṃpi katvā upaṭṭhāpetabbaṃ. Bhājanaṃ alabhantena veḷunāḷikāyapi upaṭṭhāpetabbaṃ. Taṃpi alabhantassa yathā samīpe udakaāvāto hoti evaṃ kātabbaṃ. Araṇisahite sati aggiṃ akātuṃpi vaṭṭati. Yathā ca āraññakassa evaṃ kantāraṃ paṭipannassāpi araṇisahitaṃ icchitabbaṃ. Gaṇavāsino Pana tena vināpi vaṭṭati. Nakkhattāneva nakkhattapadāni.

{369} Senāsanavatte. Dvāraṃ nāma yasmā mahāvalañjaṃ tasmā tattha āpucchanakiccaṃ natthi. Sesāni pana uddesadānādīni āpucchitvāva kātabbāni devasikaṃ āpucchituṃ vaṭṭati. Athāpi bhante āpucchitabbameva hotūti vutte vuḍḍhataro sādhūti sampaṭicchati. Sayameva vā tvaṃ yathāsukhaṃ viharāhīti vadati evaṃpi vaṭṭati. Sabhāgassa vissāsenāpi vaṭṭatiyeva. Yena vuḍḍho tena parivattitabbanti vuḍḍhābhimukhena parivattitabbaṃ. Bhojanasālādīsupi evameva paṭipajjitabbaṃ.

{371} Jantāgharavatte. Paribhaṇḍanti bahi jaggati.