{373} Ācamanavatthusmiṃ. Sati udaketi ettha sace udakaṃ atthi paṭicchannaṭṭhānaṃ pana natthi bhājanena udakaṃ nīharitvā ācamitabbaṃ. Bhājane asati pattena nīharitabbaṃ. Pattepi asati asantaṃ nāma hoti. Idaṃ ativivaṭaṃ purato aññaṃ udakaṃ bhavissatīti gatassa udakaṃ alabhantasseva bhikkhācāravelā hoti kaṭṭhena vā kenaci vā puñchitvā gantabbaṃ. Bhuñjituṃpi anumodanaṃpi kātuṃ vaṭṭati. Āgatapaṭipāṭiyāti vaccakuṭiyaṃ passāvaṭṭhāne nahānatiṭṭheti tīsupi āgatapaṭipāṭiyeva pamāṇaṃ.

{374} Vaccakuṭivatte. Na dantakaṭṭhaṃ khādantenāti ayaṃ vaccakuṭiyāpi avaccakuṭiyāpi sabbattheva paṭikkhepo. Na pharusena kaṭṭhenāti phālitakaṭṭhena vā kharena vā gaṇṭhikena vā kaṇṭakena vā susirena Vā pūtinā vā na avalekhitabbaṃ. Avalekhanakaṭṭhaṃ pana agahetvā paviṭṭhassa āpatti natthi. Na ācamanasarāvaketi sabbasādhāraṇaṭṭhānaṃ sandhāyetaṃ vuttaṃ. Tatra hi aññe aññe āgacchanti tasmā udakaṃ na sesitabbaṃ. Yaṃ pana saṅghikepi vihāre ekadese nivaddhagamanatthāya kataṭṭhānaṃ hoti puggalikaṭṭhānaṃ vā tasmiṃ vaṭṭati. Virecanaṃ pivitvā punappunaṃ pavisantassāpi vaṭṭatiyeva. Ūhatāti ohanitā bahi vaccamakkhitāti attho. Dhovitabbāti udakaṃ āharitvā dhovitabbā. Udakaṃ atthi bhājanaṃ natthi asantaṃ nāma hoti. Bhājanaṃ atthi udakaṃ natthi etaṃpi asantaṃ. Ubhaye asati asantameva. Kaṭṭhena vā kenaci vā puñchitvā gantabbaṃ. Sesaṃ sabbattha uttānamevāti.

Vattakkhandhakavaṇṇanā niṭṭhitā.