Dhammikaṃ sāmaggiṃ na upetīti kammaṃ kopetukāmatāya saṅghakamme kayiramāne neva āgacchati na chandaṃ deti sammukhībhūto ca paṭikkosati tena dukkaṭaṃ āpajjati. Iccassa sāpattikasseva pāṭimokkhaṃ ṭhapitaṃ hoti. Paccādiyatīti puna kātabbaṃ kammanti paccādiyati. Tena ukkoṭanakena pācittiyaṃ āpajjati. Iccassāpi sāpattikasseva pāṭimokkhaṃ ṭhapitaṃ hoti. {388} Yehi ākārehi yehi liṅgehi yehi nimittehīti ettha maggena maggapaṭipādanādīsu ākārādisaññā veditabbā. Tena diṭṭhena tena sutena tāya parisaṅkāyāti ettha diṭṭhañca sutañca pāliyaṃ āgatameva. Sace pana tehi diṭṭhasutehi parisaṅkaṃ uppādeyya taṃ sandhāya vutta tāya parisaṅkāyāti.
{398} Attādānaṃ ādātukāmenāti ettha sāsanaṃ sodhetukāmo bhikkhu yaṃ adhikaraṇaṃ attanā ādiyati taṃ attādānanti vuccati. Akālo imaṃ attādānaṃ ādātunti ettha rājabhayaṃ corabhayaṃ dubbhikkhabhayaṃ Vassārattoti ayaṃ akālo viparīto kālo. Abhūtaṃ idaṃ attādānanti asantamidaṃ mayā adhammo vā dhammoti dhammo vā adhammoti avinayo vā vinayoti vinayo vā avinayoti dussīlo vā puggalo sīlavāti sīlavā puggalo dussīloti gahitoti attho. Vipariyāyena bhūtaṃ veditabbaṃ. Anatthasañhitaṃ idaṃ attādānanti ettha yaṃ jīvitantarāyāya vā brahmacariyantarāyāya vā saṃvattati idaṃ anatthasañhitaṃ attādānaṃ viparītaṃ atthasañhitaṃ nāma. Na labhissāmi sandiṭṭhe sambhatte bhikkhūti appekadā hi rājabhayādīsu evarūpā attano pakkhassa upatthambhakā bhikkhū laddhuṃ na sakkā honti taṃ sandhāya vuttaṃ na labhissāmīti. Appekadā pana khemasubhikkhādīsu laddhuṃ sakkā honti taṃ sandhāya labhissāmīti vuttaṃ. Bhavissati saṅghassa tatonidānaṃ bhaṇḍananti kosambikānaṃ viya bhaṇḍanaṃ kalaho viggaho vivādo saṅghabhedo ca bhavissati. Pacchāpi avippaṭisārakaraṃ bhavissatīti subhaddavuḍḍhapabbajitaṃ niggahetvā pañcasatikasaṅgītiṃ karontassa mahākassapattherasseva dasavatthuke adhikaraṇe dasa bhikkhusahassāni niggahetvā sattasatikasaṅgītiṃ karontassa āyasmato yasasseva saṭṭhibhikkhusahassāni niggahetvā sahassakasaṅgītiṃ karontassa moggalīputtatissattherasseva ca pacchā samanussaraṇaṃ avippaṭisārakaraṃ hoti sāsanassa ca vigatupakkilesacandimasuriyasassirīkatāya saṃvattati.