{248} Na bhikkhave naccaṃ vātiādīsu yaṅkiñci naccaṃ antamaso moranaccaṃpi dassanāya gacchantassa dukkaṭaṃ. Sayaṃpi naccantassa vā naccāpentassa vā dukkaṭameva. Gītaṃpi yaṅkiñci naṭagītaṃ vā sādhugītaṃ vā antamaso dantagītaṃpi. Mayaṃ gāyissāmāti pubbabhāge okūjantā karonti etaṃpi na vaṭṭati. Sayaṃ gāyantassāpi gāyāpentassāpi dukkaṭameva. Vāditampi yaṅkiñci na vaṭṭati. Yampana niṭṭhahanto vā sāsaṅke vā ṭhito accharaṃ vā potheti pāṇiṃ vā paharati tattha anāpatti. Sabbaṃ antarārāme ṭhitassa passato anāpatti. Passissāmīti vihārato vihāraṃ gacchantassa āpattiyeva. Āsanasālāyaṃ nisinno passati anāpatti. Passissāmīti uṭṭhahitvā gacchato āpatti. Vīthiyaṃ ṭhatvā gīvaṃ parivattetvā passatopi āpattiyeva.

{249} Sarakuttinti sarakiriyaṃ. Bhaṅgo hotīti aladdhaṃ samādhiṃ uppādetuṃ na sakkoti laddhaṃ samāpajjituṃ. Pacchimā janatāti amhākaṃ ācariyāpi upajjhāyāpi evaṃ gāyiṃsūti pacchimā janatā diṭṭhānugatiṃ āpajjati tatheva gāyati. Na bhikkhave āyatakenāti ettha āyatako nāma tantaṃ vattaṃ bhinditvā akkharāni vināsetvā pavatto. Dhamme pana suttantavattaṃ nāma atthi jātakavattaṃ nāma atthi gāthāvattaṃ nāma atthi taṃ vināsetvā atidīghaṃ kātuṃ na vaṭṭati. Caturassena vattena parimaṇḍalāni padabyañjanāni dassetabbāni.

Sarabhaññanti sarena bhaṇanaṃ. Sarabhaññe kira taraṅgavattadohakavatta- galitavattādīni dvattiṃsavattāni atthi. Tesu yaṃ icchati taṃ kātuṃ labhati. Sabbesaṃ padabyañjanānaṃ avināsetvā vikāramakatvā samaṇasāruppena caturassena nayena pavattanaṃyeva lakkhaṇaṃ.

Bāhiralomiṃ uṇṇinti uṇṇalomāni bahi katvā uṇṇapāvāraṃ pārupanti. Tathā dhārentassa dukkaṭaṃ. Lomāni anto Katvā pārupituṃ vaṭṭati.