{274} Kuppaṃ karissāmīti saddaṃ karissāmi. Nakhādīhi nakhacchedane āpatti natthi. Attānurakkhanatthaṃ pana nakhacchedanaṃ anuññātaṃ.

Vīsatimaṭṭhanti vīsatipi nakhe likhitamaṭṭhe kārāpenti. Malamattanti nakhato malamattaṃ apakaḍḍhituṃ anujānāmīti attho.

{275} Khurasipāṭikanti khurakosakaṃ.

Massuṃ kappāpentīti kattariyā massuṃ chedāpenti. Massuṃ vaḍḍhāpentīti massuṃ dīghaṃ kārāpenti. Golomikanti hanukamhi dīghaṃ katvā ṭhapitaṃ eḷakamassukaṃ vuccati. Caturassakanti catukkoṇaṃ. Parimukhanti ure lomarājisaṃharaṇaṃ. Aḍḍharukanti udare lomarājiṭhapanaṃ. Āpatti dukkaṭassāti massukappanādīsu sabbattha āpatti dukkaṭassa.