Idaṃpi ca aññaṃ tattheva vuttaṃ. Dve bhikkhū saṅghikaṃ bhūmiṃ gahetvā sodhetvā saṅghikaṃ senāsanaṃ karonti. Yena sā bhūmi paṭhamaṃ gahitā so sāmī. Ubhopi puggalikaṃ karonti soyeva sāmī. So saṅghikaṃ karoti itaro puggalikaṃ karoti. Aññaṃ ce bahuṃ senāsanaṭṭhānaṃ atthi puggalikaṃ karontopi na vāretabbo. Aññasmiṃ pana tādise paṭirūpe ṭhāne asati taṃ paṭibāhitvā saṅghikaṃ karonteneva kātabbaṃ. Yaṃ pana tassa tattha vayakammaṃ kataṃ taṃ dātabbaṃ. Sace pana katāvāse vā āvāsakaraṇaṭṭhāne vā chāyūpakaphalūpakā rukkhā honti apaloketvā hāretabbā. Puggalikā ce honti sāmikā āpucchitabbā. No ce denti Yāvatatiyaṃ āpucchitvā rukkhaagghanakaṃ mūlaṃ dassāmāti hāretabbā.

Yo pana saṅghikaṃ vallīmattaṃpi agahetvā āharimena upakaraṇena saṅghikāya bhūmiyā puggalikaṃ vihāraṃ kāreti. Upaḍḍhaṃ saṅghikaṃ hoti upaḍḍhaṃ puggalikaṃ. Pāsādo ce hoti heṭṭhā pāsādo saṅghiko upari puggaliko. Sace yo heṭṭhā pāsādaṃ icchati tassa hoti. Atha heṭṭhā ca upari ca icchati ubhayattha upaḍḍhaṃ labhati. Dve senāsanāni kāreti ekaṃ saṅghikaṃ ekaṃ puggalikaṃ sace vihāre uṭṭhitena saṅghikena dabbasambhārena kāreti tatiyaṃ labhati. Sace akataṭṭhāne cayaṃ vā pamukhaṃ vā karoti bahikuḍḍe upaḍḍhaṃ saṅghassa upaḍḍhaṃ tassa. Atha mahantaṃ visamaṃ samaṃ pūretvā apade padaṃ dassetvā kataṃ hoti anissaro tattha saṅgho.