Uddesabhattakathā niṭṭhitā.

Nimantanaṃ puggalikañce sayameva issaro. Saṅghikaṃ pana uddesabhatte vuttanayeneva gāhetabbaṃ. Sace panettha dūto byatto hoti bhante rājagehe bhikkhusaṅghassa bhattaṃ gaṇhathāti avatvā bhikkhaṃ gaṇhathāti vadati piṇḍapātikānaṃpi vaṭṭati. Atha dūto abyatto bhattaṃ gaṇhathāti vadati. Bhattuddesako byatto bhattanti avatvā bhante tumhe yātha tumhe yāthāti vadati evaṃpi piṇḍapātikānaṃ vaṭṭati. Tumhākaṃ paṭipāṭiyā bhattaṃ pāpuṇātīti vutte pana na vaṭṭati sace nimantetuṃ āgatā manussā āsanasālaṃ pavisitvā aṭṭha bhikkhū dethāti vā aṭṭha patte dethāti vā vadanti evaṃpi piṇḍapātikānaṃ vaṭṭati. Tumhe ca tumhe ca gacchathāti vattabbaṃ. Sace pana aṭṭha bhikkhū detha bhattaṃ gaṇhatha aṭṭha patte detha bhattaṃ gaṇhathāti vā vadanti paṭipāṭiyā gāhetabbaṃ. Gāhentena ca vicchinditvā bhattanti avadantena tumhe ca tumhe ca gacchathāti vuttepi piṇḍapātikānaṃ vaṭṭati. Bhante tumhākaṃ pattaṃ detha tumhe ethāti vutte pana sādhu upāsakāti gantabbaṃ. Saṅghato uddisitvā tumhe ethāti vutte ṭhitikāya gāhetabbaṃ.

Nimantanabhattagharato pana pattatthāya āgatassa uddesabhatte vuttanayeneva ṭhitikāya patto dātabbo. Eko saṅghato paṭipāṭiyā pattanti avatvā kevalaṃ ekaṃ pattaṃ dethāti vatvā agāhiteyeva patte yassa kassaci pattaṃ gahetvā pūretvā āharati taṃ pattasāmikasseva hoti. Uddesabhatte viya ṭhitikāya na gāhetabbaṃ. Idhāpi yo Āgantvā tuṇhībhūto tiṭṭhati so kassa santikaṃ āgatosīti vā kassa pattaṃ harissasīti vā na vattabbo. Pucchāsabhāgena hi tumhākaṃ santikaṃ āgatomhi tumhākaṃ pattaṃ harissāmīti vadeyya. Tato so bhikkhu bhikkhūhi jigucchaniyo assa. Kuhiṃ gacchasi kiṃ karonto āhiṇḍasīti pana vutte tassa pattatthāya āgatomhīti vadantassa paṭipāṭiyā pattaṭṭhitikāya gahetvā patto dātabbo bhattāharaṇakapattaṃ dethāti vuttepi paṭipāṭiyā pattaṭṭhitikāya eva dātabbo. Sace āharitvā sabbo saṅgho bhuñjatūti vadati bhājetvā bhuñjitabbaṃ pattasāmikassa atikkantaṃpi ṭhitikaṃ ṭhapetvā aññaṃ paṭipāṭibhattaṃ gāhetabbaṃ. Eko pātiyā bhattaṃ āharitvā saṅghassa dammīti vadati. Ālopabhattaṭṭhitikato paṭṭhāya ālopasaṅkhepena bhājetabbaṃ. Sace pana tuṇhībhūto acchati kassa te ābhataṃ kassa dātukāmosīti na vattabbo. Sace pana kuhiṃ gacchasi kiṃ karonto āhiṇḍasīti vutte saṅghassa me bhattaṃ ābhataṃ therānaṃ me bhattaṃ ābhatanti vadati gahetvā ālopabhattaṭṭhitikāya bhājetvā dātabbaṃ. Sace pana evaṃ ābhataṃ bahuṃ hoti sakalasaṅghassa pahoti abhihaṭabhikkhā nāma piṇḍapātikānaṃpi vaṭaṭati. Ṭhitikāpucchanakiccaṃ natthi. Therāsanato paṭṭhāya pattaṃ pūretvā dātabbaṃ. Upāsako saṅghattherassa vā ganthadhutaṅgavasena abhiññātassa vā bhattuddesakassa vā pahiṇati amhākaṃ bhattaṃ gahaṇatthāya aṭṭha bhikkhū gahetvā āgacchathāti. Sacepi ñātiupaṭṭhākehi pesitaṃ hoti. Ime Tayo janā pucchituṃ na labhanti ārūḷhāyeva mātikā saṅghato aṭṭha bhikkhū uddesāpetvā attanavamehi gantabbaṃ. Kasmā. Bhikkhusaṅghassa hi ete bhikkhū nissāya lābho uppajjatīti. Ganthadhutaṅgādīhi pana anabhiññāto āvāsikabhikkhu pucchituṃ labhati. Tasmā tena kiṃ saṅghato gaṇhāmi udāhu ye jānāmi tehi saddhiṃ āgacchāmīti mātikaṃ āropetvā yathā dāyakā vadanti tathā paṭipajjitabbaṃ. Tumhākaṃ nissitake vā ye vā jānātha te gahetvā ethāti vutte pana ye ce icchati tehi saddhiṃ gantuṃ labhati. Sace aṭṭha bhikkhū pahiṇathāti pesenti saṅghatova pesetabbā. Attanā sace aññasmiṃ gāme sakkā hoti bhikkhaṃ labhituṃ añño gāmo gantabbo. Na sakkā ce hoti labhituṃ soyeva gāmo piṇḍāya pavisitabbo. Nimantitabhikkhū āsanasālāya nisinnā honti. Tatra ce manussā patte dethāti āgacchanti animantitehi na dātabbā. Ete nimantitā bhikkhūti vattabbaṃ. Tumhe dethāti vutte pana dātuṃ vaṭṭati. Ussavādīsu manussā sayameva pariveṇāni ca padhānagharāni ca gantvā tipiṭake ca dhammakathike ca bhikkhusatena saddhiṃ nimantenti. Tadā tehi ye jānanti te gahetvā gantuṃ vaṭṭati. Kasmā. Na hi mahābhikkhusaṅghena atthikā manussā pariveṇapadhānagharāni gacchanti. Sannipātaṭṭhānatova yathāsatti yathābalaṃ bhikkhū gahetvā gacchantīti.