Salākadāyakena pana vattaṃ jānitabbaṃ. Tena hi kālasseva vuṭṭhāya pattacīvaraṃ gāhetvā bhojanasālaṃ gantvā asammajjaṭṭhānaṃ sammajjitvā pānīyaṃ paribhojanīyaṃ upaṭṭhāpetvā idāni bhikkhūhi vattaṃ kataṃ bhavissatīti kālaṃ sallakkhetvā gaṇḍiṃ paharitvā bhikkhūsu sannipatitesu paṭhamameva vāragāme salākabhattaṃ gāhetabbaṃ. Tuyhaṃ asukasmiṃ nāma vāragāme salākā pāpuṇāti tatra gacchāti vattabbaṃ. Sace atirekagāvute gāmo hoti. Taṃ divasaṃ gacchantā kilamanti. Sve tuyhaṃ vāragāme pāpuṇātīti ajjeva gāhetabbaṃ. Yo vāragāmaṃ pesiyamāno na gacchati aññaṃ salākaṃ maggati na dātabbā. Saddhānaṃ hi manussānaṃ puññahāni saṅghassa ca lābhacchedo hoti tasmā tassa dutiyepi tatiyepi divase aññā salākā na dātabbā. Attano pattaṭṭhānaṃ gantvā bhuñjāhīti vattabbo. Tīṇi pana divasāni agacchantassa vāragāmato orimatīre gāme salākā gāhetabbā. Tañce gaṇhāti tato paṭṭhāya tassa aññaṃ salākaṃ na dātuṃ vaṭṭati. Daṇḍakammaṃ pana gāḷhaṃ kātabbaṃ. Saṭṭhito vā paññāsato vā udakaghaṭassa vā dārukalāpassa vā Vālikāya vā na parihāpetabbaṃ. Vāragāme gāhetvā vihāravāro gāhetabbo. Tuyhaṃ vihāravāro pāpuṇātīti vattabbaṃ. Vihāravārikassa dve tisso yāgusalākāyo tisso vā catasso vā bhattasalākāyo ca dātabbā nivaddhaṃ katvā pana na dātabbā. Yāgubhattadāyakā hi amhākaṃ yāgubhattaṃ vihāragopakāva bhuñjantīti aññathattaṃ āpajjeyyuṃ tasmā aññesu kulesu dātabbā. Sace vihāravārikānaṃ sabhāgā āharitvā denti iccetaṃ kusalaṃ no ce vāraṃ gāhetvā tesaṃ yāgubhattaṃ āharāpetabbaṃ. Tā ca nesaṃ salākā phātikammameva bhavanti. Vassaggena pattaṭṭhāne pana aññaṃpi paṇītabhattasalākaṃ gaṇhituṃ labhantiyeva. Atirekauttaribhaṅgassa ekavāriyabhattassa visuṃ ṭhitikaṃ katvā salākā dātabbā.

Sace yena salākā laddhā so taṃ divasaṃ taṃ bhattaṃ na labhati. Punadivase gāhetabbaṃ. Bhattameva labhati na uttaribhaṅgaṃ. Evaṃpi puna gāhetabbaṃ. Khīrabhattasalākāyapi eseva nayo. Sace pana khīrameva labhati na bhattaṃ. Khīralābhato paṭṭhāya puna na gāhetabbaṃ. Dve tīṇi ekavāriyabhattāni ekasseva pāpuṇanti. Dubbhikkhasamaye saṅghanavakena laddhakāle vijaṭetvā visuṃ visuṃ gāhetabbāni. Pākatikasalākabhattaṃ aladdhassāpi punadivase gāhetabbaṃ. Sace khuddako vihāro hoti sabbe bhikkhū ekasambhogā ucchusalākaṃ gāhentena yassakassaci sammukhībhūtassa pāpetvā mahātherānaṃ divā tacchetvā dātuṃ vaṭṭati. Rasasalākaṃ pāpetvā pacchābhattaṃpi parissāvetvā Vā phāṇitaṃ vā kāretvā piṇḍapātikānaṃpi dātabbaṃ. Āgantukānaṃ anāgatānāgatabhāvaṃ ñatvā gāhetabbā. Mahāāvāse ṭhitikaṃ katvā gāhetabbā. Takkasalākaṃpi sabhāgaṭṭhāne pāpetvā vā dhūpetvā vā pacāpetvā vā therānaṃ dātuṃ vaṭṭati. Mahāāvāse vuttanayeneva paṭipajjitabbaṃ. Phalasalākapūvasalākabhesajjagandhamālā- salākādayopi visuṃ ṭhitikāya gāhetabbā. Bhesajjādisalākāyo cettha kiñcāpi piṇḍapātikānaṃ vaṭṭanti. Salākavasena gāhitattā pana na sāditabbā. Aggabhikkhāmattaṃpi salākabhattaṃ denti. Ṭhitikaṃ pucchitvā gāhetabbaṃ. Asatiyā ṭhitikāya therāsanato paṭṭhāya dātabbaṃ. Sace tādisāni bhattāni bahūni honti. Ekekassa bhikkhuno dve tīṇi dātabbāni. No ce ekekameva datvā paṭipāṭiyā gatāya ṭhitikāya puna therāsanato paṭṭhāya dātabbaṃ. Atha antarāva upacchijjati. Ṭhitikā sallakkhetabbā. Yadi pana tādisaṃ bhattaṃ nivaddhameva hoti. Yassa pāpuṇāti so vattabbo laddhā vā aladdhā vā svepi gaṇheyyāsīti. Ekaṃ anivaddhaṃ hoti. Labhanadivase pana yāvadatthaṃ labhati. Alabhanadivasā bahutarā honti. Taṃ yassa na pāpuṇāti. So alabhitvā sveva gaṇheyyāsīti vattabbo. Yo salākāsu gāhitāsu pacchā āgacchati. Tassa atikkantāva salākā na upaṭṭhapetvā dātabbā. Salākalābhaṃ nāma gaṇḍiṃ paharaṇato paṭṭhāya āgantvā hatthaṃ pasārentova labhati. Aññassa āgantvā samīpe ṭhitassāpi Atikkantāva hoti. Sace panassa añño gaṇhanto atthi sayaṃ anāgatopi labhati. Sabhāgaṭṭhāne asuko anāgatoti ñatvā ayaṃ tassa salākāti ṭhapetuṃ vaṭṭati. Sace anāgatassāpi na dātabbāti katikaṃ karonti adhammikā hoti. Antoupacāre ṭhitassa hi bhājanīyabhaṇḍaṃ pāpuṇāti. Sace pana anāgatassa dethāti mahāsaddaṃ karonti daṇḍakammaṃ paṭṭhapetabbaṃ. Āgantvā gaṇhantūti vattabbaṃ. Chappañca salākā naṭṭhā honti. Bhattuddesako dāyakānaṃ nāmaṃ na sarati. So ce naṭṭhā salākā mahātherassa vā attano vā pāpetvā bhikkhū vadeyya mayā asukagāme salākabhattaṃ mayhaṃ pāpitaṃ tumhe tattha laddhaṃ salākabhattaṃ bhuñjeyyāthāti vaṭṭati. Vihāre apāpitaṃ pana āsanasālāya taṃ bhattaṃ labhitvā tattheva pāpetvā bhuñjituṃ na vaṭṭati. Ajjato paṭṭhāya mayhaṃ salākabhattaṃ gaṇhathāti vutte tatra āsanasālāyaṃ gāhetuṃ na vaṭṭati. Vihāraṃ ānetvā gāhetabbaṃ. Sve paṭṭhāyāti vutte pana bhattuddesakassa ācikkhitabbaṃ sve paṭṭhāya asukakulaṃ nāma salākabhattaṃ deti salākagāhanakāle sareyyāsīti. Dubbhikkhe salākabhattaṃ pacchinditvā subhikkhe jāte kañci bhikkhuṃ disvā ajjato paṭṭhāya amhākaṃ salākabhattaṃ gaṇhathāti puna paṭṭhapenti. Antogāme agāhetvā vihāraṃ ānetvāva gāhetabbaṃ. Idaṃ hi salākabhattaṃ nāma uddesabhattasadisaṃ na hoti vihārameva sandhāya diyyati tasmā bahiupacāre gāhituṃ na Vaṭṭati. Sve paṭṭhāyāti vutte pana vihāre gāhetabbameva.