Āvāsikāpi bhuñjantūti vadanti vaṭṭati avutte na vaṭṭati.

Gamiyabhattepi ayameva kathāmaggo. Ayaṃ pana viseso. Āgantuko āgantukabhattameva labhati. Gamiko āgantukabhattaṃpi gamiyabhattaṃpi labhati. Āvāsikopi pakkamitukāmo gamiko hoti gamiyabhattaṃ labhati. Yathā pana āgantukabhattaṃ labbhati evamidaṃ dve tīṇi satta vā divasāni na labbhati. Gamissāmīti bhutto taṃ divasaṃ kenacideva karaṇīyena na gato punadivasepi bhuñjituṃ vaṭṭati saussāhattā. Gamissāmīti bhuttassa corā vā pathaṃ rundhanti udakaṃ vā devo vā vassati sattho vā na gacchati saussāhena bhuñjitabbaṃ. Ete upaddave olokentena dve tayo divase bhuñjituṃ vaṭṭatīti mahāpaccariyaṃ vuttaṃ. Gamissāmi gamissāmīti pana lesaṃ oḍḍetvā bhuñjituṃ na labhati. Gilānabhattaṃpi sace sabbesaṃ gilānānaṃ pahoti sabbesaṃ dātabbaṃ. No ce ṭhitikaṃ katvā gāhetabbaṃ. Eko gilāno arogarūpo sakkoti antogāmaṃ gantuṃ eko na sakkoti ayaṃ mahāgilāno nāma. Etassa gilānabhattaṃpi dātabbaṃ. Dve mahāgilānā eko lābhī abhiññāto bahuṃ khādanīyaṃ bhojanīyaṃ labhati eko anātho appalābhatāya antogāmaṃ pavisati etassa gilānabhattaṃ dātabbaṃ. Gilānabhatte divasaparicchedo natthi. Yāva rogo na vūpasammati sappāyabhojanaṃ abhuñjanto na yāpeti tāva bhuñjitabbaṃ. Yadā pana missakayāguṃ vā missakabhattaṃ vā bhuñjantassāpi rogo na kuppati tato Paṭṭhāya na bhuñjitabbaṃ. Gilānupaṭṭhākabhattaṃpi sabbesaṃ pahoti taṃ sabbesaṃ dātabbaṃ. No ce pahoti ṭhitikaṃ katvā gāhetabbaṃ. Idaṃpi dvīsu gilānesu mahāgilānupaṭṭhākassa gāhetabbaṃ. Dvīsu mahāgilānesu anāthagilānupaṭṭhākassa yaṃ kulaṃ gilānabhattaṃpi deti gilānupaṭṭhākabhattaṃpi. Tattha yassa gilānassa bhattaṃ pāpuṇāti tadupaṭṭhākassāpi tattheva gāhetabbaṃ. Gilānupaṭṭhākabhattepi divasaparicchedo natthi. Yāva gilāno labhati tāvassa upaṭṭhākopi labhatīti. Imāni cattāri bhattāni sace evaṃ dinnāni honti āgantukagamiyagilānagilānupaṭṭhākā mama bhikkhaṃ gaṇhantūti piṇḍapātikānaṃpi vaṭṭati. Sace pana āgantukādīnaṃ bhattaṃ nibaddhāpemi mama bhattaṃ gaṇhantūti evaṃ dinnāni honti piṇḍapātikānaṃ na vaṭṭati.