Asukavihāre bahu sappi uppannanti sutvā yojanantaravihāratopi bhikkhū āgacchanti. Sampattasampattānaṃ ṭhitaṭṭhānato paṭṭhāya dātabbaṃ. Asampattānaṃpi upacārasīmaṃ paviṭṭhānaṃ antevāsikādīsu gaṇhantesu dātabbameva. Bahiupacārasīmāya ṭhitānaṃ dethāti vadanti na dātabbaṃ. Sace upacārasīmaṃ okkamantehi ekābaddhā hutvā attano vihāradvāre vā antovihāreyeva vā honti parisavasena vaḍḍhitā nāma sīmā hoti tasmā dātabbaṃ. Saṅghanavakassa dinnepi pacchā āgatānaṃ dātabbameva. Dutiyabhāge pana therāsanaṃ ārūḷhe puna pacchā āgatānaṃ paṭhamabhāgo na pāpuṇāti dutiyabhāgato vassaggena dātabbaṃ. Upacārasīmaṃ pavisitvā yattha katthaci dinnaṃ hoti sabbaṃ sannipātaṭṭhāneyeva bhājetabbaṃ.
Yasmiṃ vihāre dasa bhikkhū daseva ca sappikumbhādīni dīyanti ekekakumbhavasena bhājetabbaṃ. Eko sappikumbho hoti dasa bhikkhū bhājetvā gāhetabbaṃ. Sace yathāṭhitaṃyeva amhākaṃ pāpuṇātīti gaṇhanti duggahitaṃ gatagataṭṭhāne saṅghikameva hoti. Kumbhaṃ pana āvaṭṭetvā thālake thokaṃ sappiṃ katvā idaṃ mahātherassa pāpuṇāti avasesaṃ amhākaṃ pāpuṇātīti vatvā taṃ paṭikumbheyeva ākiritvā yathicchitaṃ gahetvā gantuṃ vaṭṭati. Sace thīnaṃ sappi hoti lekhaṃ katvā lekhato parabhāgo mahātherassa pāpuṇāti avasesaṃ amhākanti gahitaṃpi sugahitaṃ. Vuttaparicchedato onādhikesupi bhikkhūsu ca sappikumbhesu ca eteneva upāyena bhājetabbaṃ. Sace paneko bhikkhu eko kumbho hoti gaṇḍiṃ paharitvā ayaṃ mayhaṃ pāpuṇātītipi gahetuṃ vaṭṭati ayaṃ paṭhamabhāgo mayhaṃ pāpuṇāti ayaṃ dutiyabhāgoti evaṃ thokaṃ thokaṃ pāpetuṃpi vaṭṭati. Esa nayo navanītādīsupi. Yasmiṃ pana vippasanne tilatelādimhi lekhā na santiṭṭhati taṃ uddharitvāva bhājetabbaṃ. Siṅgiveramaricādibhesajjaṃpi avasesapattathālakādi samaṇaparikkhāropi sabbo vuttānurūpeneva nayena suṭṭhu sallakkhetvā bhājetabboti.
Pāliṃ aṭṭhakathañceva oloketvā vicakkhaṇo
saṅghike paccaye evaṃ appamatto vibhājaye.