TIPITAKA Volume 7 : PALI ROMAN Vinaya Pitaka Vol 7 : Vinaya. Culla (2)

[173] Tena kho pana samayena bhikkhū dantakaṭṭhaṃ na khādanti. Mukhaṃ duggandhaṃ hoti . bhagavato etamatthaṃ ārocesuṃ .pe. Pañcime bhikkhave ādīnavā dantakaṭṭhassa akhādane acakkhussaṃ mukhaṃ duggandhaṃ hoti rasaharaṇiyo na visujjhanti pittaṃpi semhaṃpi bhattaṃ pariyonaddhati 1- bhattamassa na chādeti ime kho bhikkhave pañca ādīnavā dantakaṭṭhassa akhādane . pañcime bhikkhave ānisaṃsā dantakaṭṭhassa khādane cakkhussaṃ mukhaṃ na duggandhaṃ hoti rasaharaṇiyo visujjhanti pittaṃpi semhaṃpi bhattaṃ na pariyonaddhati 1- bhattamassa chādeti ime kho bhikkhave pañca ānisaṃsā dantakaṭṭhassa khādane. Anujānāmi bhikkhave dantakaṭṭhanti. @Footnote: 1 Ma. Yu. pittaṃ semhaṃ bhattaṃ pariyonandhati.

[174] Tena kho pana samayena chabbaggiyā bhikkhū dīghāni dantakaṭṭhāni khādanti teheva sāmaṇere 1- ākoṭenti . bhagavato etamatthaṃ ārocesuṃ .pe. na bhikkhave dīghaṃ dantakaṭṭhaṃ khāditabbaṃ yo khādeyya āpatti dukkaṭassa anujānāmi bhikkhave aṭṭhaṅgulaparamaṃ dantakaṭṭhaṃ na ca teneva 2- sāmaṇero ākoṭetabbo yo ākoṭeyya āpatti dukkaṭassāti.

[175] Tena kho pana samayena aññatarassa bhikkhuno atimandāhakaṃ 3- dantakaṭṭhaṃ khādantassa kaṇṭhe vilaggaṃ hoti . bhagavato etamatthaṃ ārocesuṃ .pe. na bhikkhave atimandāhakaṃ 3- dantakaṭṭhaṃ khāditabbaṃ yo khādeyya āpatti dukkaṭassa anujānāmi bhikkhave caturaṅgulaṃ pacchimaṃ dantakaṭṭhanti.