[85] Tena kho pana samayena bhikkhū khuddake jantāghare majjhe aggiṭṭhānaṃ karonti . upacāro na hoti .pe. anujānāmi bhikkhave khuddake jantāghare ekamantaṃ aggiṭṭhānaṃ kātuṃ mahallake majjheti . jantāghare aggi mukhaṃ ḍahati .pe. anujānāmi bhikkhave mukhamattikanti . hatthena mattikaṃ tementi .pe. anujānāmi bhikkhave mattikādoṇikanti . mattikā duggandhā honti .pe. Anujānāmi bhikkhave vāsetunti.

[86] Tena kho pana samayena jantāghare aggi kāyaṃ ḍahati .pe. Anujānāmi bhikkhave udakaṃ atiharitunti . pāṭiyāpi pattenapi udakaṃ atiharanti .pe. anujānāmi bhikkhave udakanidhānaṃ 2- udakasarāvakanti. Jantāgharaṃ tiṇacchadanaṃ na sedeti .pe. anujānāmi bhikkhave ogumbetvā 3- ullittāvalittaṃ kātunti . jantāgharaṃ cikkhallaṃ hoti .pe. anujānāmi bhikkhave santharituṃ tayo santhāre 4- iṭṭhakāsanthāraṃ @Footnote: 1 Ma. aggaḷavaṭṭikaṃ. 2 Yu. udakaṭṭhānaṃ. 3 Ma. Yu. ogumphetvā. @ 4 Ma. santhare. Silāsanthāraṃ dārusanthāranti . cikkhallaṃyeva hoti .pe. anujānāmi bhikkhave dhovitunti . udakaṃ santiṭṭhati .pe. anujānāmi bhikkhave udakaniddhamananti.

[87] Tena kho pana samayena bhikkhū jantāghare chamāyaṃ nisīdanti gattāni kaṇḍavanti 1- .pe. Anujānāmi bhikkhave jantāgharapīṭhanti.

[88] Tena kho pana samayena jantāgharaṃ aparikkhittaṃ hoti .pe. Anujānāmi bhikkhave parikkhipituṃ tayo pākāre iṭṭhakāpākāraṃ silāpākāraṃ dārupākāranti . koṭṭhako na hoti .pe. anujānāmi bhikkhave koṭṭhakanti . koṭṭhako nīcavatthuko hoti . udakena otthariyati .pe. anujānāmi bhikkhave uccavatthukaṃ kātunti . cayo paripatati .pe. anujānāmi bhikkhave cinituṃ tayo caye iṭṭhakācayaṃ silācayaṃ dārucayanti . ārohantā vihaññanti .pe. anujānāmi bhikkhave tayo sopāṇe iṭṭhakāsopāṇaṃ silāsopāṇaṃ dārusopāṇanti . Ārohantā paripatanti .pe. anujānāmi bhikkhave ālambanabāhanti . Koṭṭhakassa kavāṭaṃ na hoti .pe. anujānāmi bhikkhave kavāṭaṃ piṭṭhasaṅghāṭaṃ udukkhalikaṃ uttarapāsakaṃ aggaḷavaṭṭiṃ 2- kapisīsakaṃ sūcikaṃ ghaṭikaṃ tālacchiddaṃ āviñchanacchiddaṃ āviñchanarajjunti.