[138] Byattena bhikkhunā paṭibalena saṅgho ñāpetabbo suṇātu me bhante saṅgho ayaṃ itthannāmo bhikkhu gilāno na @Footnote: 1 Ma. Yu. daṇḍasammutiṃ. 2 Yu. itisaddo natthi. Sakkoti vinā daṇḍena āhiṇḍituṃ so saṅghaṃ daṇḍasammatiṃ yācati . yadi saṅghassa pattakallaṃ saṅgho itthannāmassa bhikkhuno daṇḍasammatiṃ dadeyya . esā ñatti . suṇātu me bhante saṅgho ayaṃ itthannāmo bhikkhu gilāno na sakkoti vinā daṇḍena āhiṇḍituṃ so saṅghaṃ daṇḍasammatiṃ yācati . saṅgho itthannāmassa bhikkhuno daṇḍasammatiṃ deti . yassāyasmato khamati itthannāmassa bhikkhuno daṇḍasammatiyā dānaṃ so tuṇhassa yassa nakkhamati so bhāseyya . dinnā saṅghena itthannāmassa bhikkhuno daṇḍasammati khamati saṅghassa tasmā tuṇhī. Evametaṃ dhārayāmīti.

[139] Tena kho pana samayena aññataro bhikkhu gilāno hoti na sakkoti vinā sikkāya pattaṃ pariharituṃ . bhagavato etamatthaṃ ārocesuṃ . anujānāmi bhikkhave gilānassa bhikkhuno sikkāsammatiṃ dātuṃ.

[140] Evañca pana bhikkhave dātabbā . tena gilānena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo ahaṃ bhante gilāno na sakkomi vinā sikkāya pattaṃ pariharituṃ sohaṃ bhante saṅghaṃ sikkāsammatiṃ yācāmīti . dutiyampi yācitabbā tatiyampi yācitabbā.

[141] Byattena bhikkhunā paṭibalena saṅgho ñāpetabbo {141.1} Suṇātu me bhante saṅgho ayaṃ itthannāmo bhikkhu gilāno na sakkoti vinā sikkāya pattaṃ pariharituṃ so saṅghaṃ sikkāsammatiṃ yācati . yadi saṅghassa pattakallaṃ saṅgho itthannāmassa bhikkhuno sikkāsammatiṃ dadeyya. Esā ñatti. {141.2} Suṇātu me bhante saṅgho ayaṃ itthannāmo bhikkhu gilāno na sakkoti vinā sikkāya pattaṃ pariharituṃ so saṅghaṃ sikkāsammatiṃ yācati . saṅgho itthannāmassa bhikkhuno sikkāsammatiṃ deti . yassāyasmato khamati itthannāmassa bhikkhuno sikkāsammatiyā dānaṃ so tuṇhassa yassa nakkhamati so bhāseyya. {141.3} Dinnā saṅghena itthannāmassa bhikkhuno sikkāsammati khamati saṅghassa tasmā tuṇhī. Evametaṃ dhārayāmīti.