[151] Tena kho pana samayena aññatarassa bhikkhuno sambādhe vaṇo hoti . bhesajjaṃ na santiṭṭhati .pe. bhagavato etamatthaṃ @Footnote: 1 Ma. Yu. aḍḍhadukaṃ. 2 massuṃ. Ārocesuṃ . anujānāmi bhikkhave ābādhappaccayā sambādhe lomaṃ saṃharāpetunti.

[152] Tena kho pana samayena chabbaggiyā bhikkhū kattarikāya kese chedāpenti . manussā ujjhāyanti khīyanti vipācenti .pe. seyyathāpi gihī kāmabhoginoti .pe. bhagavato etamatthaṃ ārocesuṃ .pe. na bhikkhave kattarikāya kesā chedāpetabbā yo chedāpeyya āpatti dukkaṭassāti.

[153] Tena kho pana samayena aññatarassa bhikkhuno sīse vaṇo hoti . na sakkoti khurena kese oropetuṃ . bhagavato etamatthaṃ ārocesuṃ . anujānāmi bhikkhave ābādhappaccayā kattarikāya kese chedāpetunti.

[154] Tena kho pana samayena bhikkhū dīghāni nāsikālomāni dhārenti . manussā ujjhāyanti khīyanti vipācenti .pe. Seyyathāpi pisācillikāti .pe. bhagavato etamatthaṃ ārocesuṃ . Na bhikkhave dīghaṃ nāsikālomaṃ dhāretabbaṃ yo dhāreyya āpatti dukkaṭassāti.