[155] Tena kho pana samayena bhikkhū sakkharikāyapi madhusitthakenapi nāsikālomaṃ gāhāpenti . nāsikā dukkhā honti .pe. anujānāmi bhikkhave saṇḍāsanti.

[156] Tena kho pana samayena chabbaggiyā bhikkhū palitaṃ Gāhāpenti . manussā ujjhāyanti khīyanti vipācenti .pe. Seyyathāpi gihī kāmabhoginoti .pe. bhagavato etamatthaṃ ārocesuṃ .pe. na bhikkhave palitaṃ gāhāpetabbaṃ yo gāhāpeyya āpatti dukkaṭassāti.

[157] Tena kho pana samayena aññatarassa bhikkhuno kaṇṇagūthakehi kaṇṇā thakitā honti .pe. bhagavato etamatthaṃ ārocesuṃ .pe. Anujānāmi bhikkhave kaṇṇamalaharaṇinti.

[158] Tena kho pana samayena chabbaggiyā bhikkhū uccāvacā kaṇṇamalaharaṇiyo dhārenti sovaṇṇamayaṃ rūpiyamayaṃ . manussā ujjhāyanti khīyanti vipācenti .pe. seyyathāpi gihī kāmabhoginoti .pe. bhagavato etamatthaṃ ārocesuṃ .pe. na bhikkhave uccāvacā kaṇṇamalaharaṇiyo dhāretabbā yo dhāreyya āpatti dukkaṭassa anujānāmi bhikkhave kaṇṇamalaharaṇiyo 1- aṭṭhimayaṃ dantamayaṃ visāṇamayaṃ naḷamayaṃ veḷumayaṃ kaṭṭhamayaṃ jatumayaṃ phalamayaṃ lohamayaṃ saṅkhanābhimayanti.