สมุฏฺฐานวณฺณนา

{๔๗๐} อจิตฺตโก อาปชฺชตีติอาทีสุ ฯ สหเสยฺยาทิปณฺณตฺติวชฺชํ อสญฺจิจฺจ อาปชฺชนฺโต อจิตฺตโก อาปชฺชติ เทเสนฺโต สจิตฺตโก วุฏฺฐาติ ฯ ยงฺกิญฺจิ สญฺจิจฺจ อาปชฺชนฺโต สจิตฺตโก อาปชฺชติ ฯ ติณวตฺถารเกน วุฏฺฐหนฺโต อจิตฺตโก วุฏฺฐาติ ฯ ปุพฺเพ วุตฺตเมว ติณวตฺถารเกน วุฏฺฐหนฺโต อจิตฺตโก อาปชฺชติ อจิตฺตโก วุฏฺฐาติ ฯ อิตรํ เทเสนฺโต สจิตฺตโก อาปชฺชติ สจิตฺตโก วุฏฺฐาติ ฯ ธมฺมทานํ กโรมีติ ปทโส ธมฺมาทีนิ กโรนฺโต กุสลจิตฺโต อาปชฺชติ ฯ พุทฺธานํ อนุสาสนํ กโรมีติ อุทคฺคจิตฺโต เทเสนฺโต กุสลจิตฺโต วุฏฺฐาติ ฯ โทมนสฺสิโต หุตฺวา เทเสนฺโต อกุสลจิตฺโต วุฏฺฐาติ ฯ ติณวตฺถารเกน นิทฺทาคโต วุฏฺฐหนฺโต อพฺยากตจิตฺโต วุฏฺฐาติ ฯ ภึสาปนาทีนิ กตฺวา พุทฺธานํ สาสนํ กโรมีติ โสมนสฺสิโต เทเสนฺโต อกุสลจิตฺโต อาปชฺชติ กุสลจิตฺโต วุฏฺฐาติ ฯ โทมนสฺสิโตว เทเสนฺโต อกุสลจิตฺโต วุฏฺฐาติ ฯ วุตฺตนเยเนว ติณวตฺถารเกน วุฏฺฐหนฺโต อพฺยากตจิตฺโต วุฏฺฐาติ ฯ นิทฺโทกฺกนฺตสมเย สหาคารเสยฺยํ อาปชฺชนฺโต อพฺยากตจิตฺโต อาปชฺชติ ฯ วุตฺตนเยเนว ปเนตฺถ กุสลจิตฺโต วุฏฺฐาตีติอาทิ เวทิตพฺพํ ฯ

ปฐมํ ปาราชิกํ กตีหิ สมุฏฺฐาเนหีติอาทิ ปุพฺเพ วุตฺตนยตฺตา อุตฺตานเมว ฯ

{๔๗๓} จตฺตาโร ปาราชิกา ตีหิ สมุฏฺฐาเนหีติอาทีสุ อุกฺกฏฺฐปริจฺเฉทโต ยํ ยํ สมุฏฺฐานํ ยสฺส ยสฺส ลพฺภติ ตํ สพฺพํ วุตฺตเมว โหติ ฯ