รตนํ สูจิ มญฺโจ จ ตูลํ นิสีทนกณฺฑุ จ วสฺสิกา จ สุคเตนาติ รตนสิกฺขาปทญฺเจว สูจิฆรสิกฺขาปทาทีนิ จ สตฺต สิกฺขาปทานิ ฯ วิญฺญตฺติ อญฺญเจตาปนา เทฺว สงฺฆิกา มหาชนิกา เทฺว ปุคฺคลา ลหุกา ครูติ ยา ปน ภิกฺขุนี อญฺญํ วิญฺญาเปตฺวา อญฺญํ วิญฺญาเปยฺยาติอาทีนิ นว สิกฺขาปฺทานิ ฯ เทฺว วิฆาสา สาฏิกา จาติ อุจฺจารํ วา ปสฺสาวํ วา สงฺการํ วา วิฆาสํ วา ติโรกุฑฺเฑ วา ติโรปากาเร วา ฉฑฺเฑยฺย วา ฉฑฺฑาเปยฺย วา หริเต ฉฑฺเฑยฺย วา ฉฑฺฑาเปยฺย วาติ เอวํ วุตฺตานิ เทฺว วิฆาสสิกฺขาปทานิ จ อุทกสาฏิกสิกฺขาปทญฺจ ฯ สมณจีวเรน จาติ สมณจีวรํ ทเทยฺยาติ อิทเมตํ สนฺธาย วุตฺตํ ฯ

{๒๖๑} เภทานุวตฺตทุพฺพจทูสทุฏฺฐุลฺลทิฏฺฐิ จาติ สงฺฆเภทานุวตฺตกทุพฺพจ กุลทูสก ทุฏฺฐุลฺลาปตฺติปฏิจฺฉาทน ทิฏฺฐิ อปฺปฏินิสฺสชฺชน สิกฺขาปทานิ ฯ ฉนฺทํ อุชฺชคฺฆิกา เทฺว จาติ ฉนฺทํ อทตฺวา คมนสิกฺขาปทํ อุชฺชคฺฆิกาย อนฺตรฆเร คมนนิสีทนสิกฺขาปททฺวยํ จ ฯ เทฺวปฺปสทฺทาติ อปฺปสทฺโท อนฺตรฆเร คมิสฺสามิ นิสีทิสฺสามีติ สิกฺขาปททฺวยํ จ ฯ น พฺยาหเรติ น สกวเฬน มุเขน พฺยาหริสฺสามีติ สิกฺขาปทํ ฯ

ฉมา นีจาสเน ฐานํ ปจฺฉโต อุปฺปเถน จาติ ฉมายํ นิสีทิตฺวา นีเจ อาสเน นิสีทิตฺวา ฐิเตน นิสินฺนสฺส ปจฺฉโต คจฺฉนฺเตน ปุรโต คจฺฉนฺตสฺส อุปฺปเถน คจฺฉนฺเตน ปเถน คจฺฉนฺตสฺส ธมฺมเทสนสิกฺขาปทานิ ฯ วชฺชานุวตฺติ คหณาติ วชฺชปฏิจฺฉาทน- อุกฺขิตฺตานุวตฺตนหตฺถคหณาทิสงฺขาตานิ ตีณิ ปาราชิกานิ ฯ โอสาเร ปจฺจาจิกฺขนาติ อนปโลเกตฺวา การกสงฺฆํ อนญฺญาย คณสฺส ฉนฺทํ โอสาเรยฺยาติ จ พุทฺธํ ปจฺจาจิกฺขามีติ จ วุตฺตสิกฺขาปททฺวยํ ฯ

กสฺมึ สํสฏฺฐา เทฺว วธีติ กิสฺมิญฺจิเทว อธิกรเณ ปจฺฉากตาติ จ ภิกฺขุนิโย ปเนว สํสฏฺฐา วิหรนฺตีติ จ ยา ปน ภิกฺขุนี เอวํ วเทยฺย สํสฏฺฐาว อยฺเย ตุมฺเห วิหรถาติ จ อตฺตานํ วธิตฺวา วธิตฺวา โรเทยฺยาติ จ วุตฺตสิกฺขาปทานิ ฯ วิสิพฺเพ ทุกฺขิตาย จาติ ภิกฺขุนิยา จีวรํ วิสิพฺเพตฺวา วา วิสิพฺพาเปตฺวา วาติ จ ทุกฺขิตํ สหชีวินินฺติ จ วุตฺตสิกฺขาปททฺวยํ ฯ ปุน สํสฏฺฐา น วูปสเมติ สํสฏฺฐา วิหเรยฺย คหปตินา วา คหปติปุตฺเตน วาติ เอวํ ปุน วุตฺตํ สํสฏฺฐสิกฺขาปทญฺจ เอหยฺเย อิมํ อธิกรณํ วูปสเมหีติ วุจฺจมานา สาธูติ ปฏิสฺสุณิตฺวา สา ปจฺฉา อนนฺตรายิกินี เนว วูปสเมยฺยาติ วุตฺตสิกฺขาปทญฺจ ฯ อารามญฺจ ปวารณาติ ชานํ สภิกฺขุกํ อารามํ อนาปุจฺฉา ปวิเสยฺยาติ จ อุภโตสงฺเฆ ตีหิ ฐาเนหิ น ปวาเรยฺยาติ จ วุตฺตสิกฺขาปททฺวยํ ฯ อนฺวฑฺฒมาสํ สหชีวินี เทฺวติ อนฺวฑฺฒมาสํ ภิกฺขุนิยา ภิกฺขุสงฺฆโต เทฺว ธมฺมา ปจฺจาสึสิตพฺพาติ วุตฺตสิกฺขาปทญฺจ สหชีวินึ วุฏฺฐาเปตฺวา เทฺว วสฺสานิ เนว อนุคฺคเหยฺย สหชีวินึ วุฏฺฐาเปตฺวา เนว วูปกาเสยฺยาติ วุตฺตสิกฺขาปททฺวยญฺจ ฯ จีวรํ อนุพนฺธนาติ สเจ เม ตฺวํ อยฺเย จีวรํ ทสฺสสิ เอวาหนฺตํ วุฏฺฐาเปสฺสามีติ จ สเจ มํ ตฺวํ อยฺเย เทฺว วสฺสานิ อนุพนฺธิสฺสสิ เอวาหนฺตํ วุฏฺฐาเปสฺสามีติ จ วุตฺตสิกฺขาปททฺวยํ ฯ สตฺตตฺตึส อิเม ธมฺมา ฯ