{๒๖๒} อุพฺภตํ กฐินํ ตีณีติ นิฏฺฐิตจีวรสฺมึ ภิกฺขุนา อุพฺภตสฺมึ กฐิเนติ วุตฺตานิ อาทิโต จ ตีณิ สิกฺขาปทานิ ฯ ปฐมํ ปตฺตเภสชฺชนฺติ ทสาหปรมํ อติเรกปตฺโตติ วุตฺตปฐมปตฺตสิกฺขาปทญฺจ ปฏิสายนียานิ เภสชฺชานีติ วุตฺตสิกฺขาปทญฺจ ฯ อจฺเจกญฺจาปิ สาสงฺกนฺติ อจฺเจกจีวรสิกฺขาปทญฺจ ตทนนฺตรเมว สาสงฺกสิกฺขาปทญฺจ ฯ ปกฺกมนฺเตน วา ทุเวติ ตํ ปกฺกมนฺโต เนว อุทฺธเรยฺยาติ ภูตคามวคฺเค วุตฺตสิกฺขาปททฺวยํ ฯ อุปสฺสยํ ปรมฺปราติ ภิกฺขุนีอุปสฺสยํ คนฺตฺวา ภิกฺขุนิโย โอวเทยฺยาติ จ ปรมฺปรโภชเน ปาจิตฺติยนฺติ จ วุตฺต- สิกฺขาปททฺวยญฺจ ฯ อนติริตฺตํ นิมนฺตนาติ อนติริตฺตํ ขาทนียํ วา โภชนียํ วาติ จ นิมนฺติโต สภตฺโต สมาโนติ จ วุตฺตสิกฺขาปททฺวยํ ฯ วิกปฺปํ รญฺโญ วิกาเลติ สามํ จีวรํ วิกปฺเปตฺวาติ จ รญฺโญ ขตฺติยสฺสาติ จ วิกาเล คามํ ปวิเสยฺยาติ จ วุตฺตสิกฺขาปทตฺตยํ ฯ โวสาสารญฺญเกน จาติ โวสาสมานรูปา ฐิตาติ จ ตถารูเปสุ อารญฺญเกสุ เสนาสเนสุ ปุพฺเพ อปฺปฏิสํวิทิตนฺติ จ วุตฺตสิกฺขาปททฺวยํ ฯ อุสูยา สนฺนิจยญฺจาติ อุสูยวาทิกาติ จ ปตฺตสนฺนิจยํ กเรยฺยาติ จ วุตฺตสิกฺขาปททฺวยํ ฯ ปุเร ปจฺฉา วิกาเล จาติ ยา ปน ภิกฺขุนี ปุเรภตฺตํ กุลานิ อุปสงฺกมิตฺวาติ จ ปจฺฉาภตฺตํ กุลานิ อุปสงฺกมิตฺวาติ จ ยา ปน ภิกฺขุนี วิกาเล กุลานิ อุปสงฺกมิตฺวาติ จ วุตฺตสิกฺขาปทตฺตยํ ฯ ปญฺจาหิกา สงฺกมนีติ ปญฺจาหิกํ สงฺฆาฏิวารํ อติกฺกเมยฺยาติ จ จีวรํ สงฺกมนิยํ ธาเรยฺยาติ จ วุตฺตสิกฺขาปททฺวยํ ฯ เทฺวปิ อาวสเถน จาติ อาวสถจีวรํ อนิสฺสชฺชิตฺวา ปริภุญฺเชยฺย อาวสถํ อนิสฺสชฺชิตฺวา จาริกํ ปกฺกเมยฺยาติ เอวํ อาวสเถน สทฺธึ วุตฺตสิกฺขาปทานิ จ เทฺว ฯ ปสาเข อาสเน เจวาติ ปสาเข ชาตํ คณฺฑํ วาติ จ ภิกฺขุสฺส ปุรโต อนาปุจฺฉา อาสเน นิสีเทยฺยาติ จ วุตฺตสิกฺขาปททฺวยํ ฯ ตึสเอกูนกา อิเม ฯ

{๒๖๓} เอฬกโลมา เทฺว เสยฺยาติ เอฬกโลมสิกฺขาปทญฺเจว เทฺว จ สหเสยฺยสิกฺขาปทานิ ฯ อาหจฺจปิณฺฑโภชนนฺติ อาหจฺจปาทก- สิกฺขาปทญฺจ อาวสถปิณฺฑโภชนสิกฺขาปทญฺจ ฯ คณวิกาลสนฺนิธีติ คณโภชนวิกาลโภชนสนฺนิธิการกสิกฺขาปทตฺตยํ ฯ ทนฺตโปเณนเจลกาติ ทนฺตโปณสิกฺขาปทญฺจ อเจลกสิกฺขาปทญฺจ ฯ อุยฺยุตฺตํ วเส อุยฺโยธีติ อุยฺยุตฺตํ เสนํ ทสฺสนาย คจฺเฉยฺย เสนาย วเสยฺย อุยฺโยธิกํ วา ฯเปฯ อนีกทสฺสนํ วา คจฺเฉยฺยาติ วุตฺตสิกฺขาปทตฺตยํ ฯ สุรา โอเรน นหายนาติ สุราปานสิกฺขาปทญฺจ โอเรนฑฺฒมาสํ นหานสิกฺขาปทญฺจ ฯ ทุพฺพณฺเณ เทฺว เทสนิกาติ ติณฺณํ ทุพฺพณฺณกรณานนฺติ วุตฺตสิกฺขาปทญฺจ วุตฺตาวเสสํ ปาฏิเทสนียทฺวยญฺจ ฯ ลสุณุตฺติฏฺเฐ นจฺจนาติ ลสุณสิกฺขาปทญฺจ ภิกฺขุสฺส ภุญฺชนฺตสฺส ปานีเยน วา วิธูปเนน วา อุปติฏฺเฐยฺยาติ วุตฺตสิกฺขาปทญฺจ นจฺจํ วา คีตํ วา วาทิตํ วา ทสฺสนาย คจฺเฉยฺยาติ วุตฺตสิกฺขาปทญฺจ ฯ อิโต ปรํ ปาลึ วิรชฺฌิตฺวา ลิขนฺติ ฯ ยถา ปน อตฺถํ วณฺณยาม เอวเมตฺถ อนุกฺกโม เวทิตพฺโพ ฯ นหานํ อตฺถรณํ เสยฺยาติ นคฺคา นหาเยยฺยุํ เอกตฺถรณปาปุรณา ตุวฏฺเฏยฺยุํ เอกมญฺเจ ตุวฏฺเฏยฺยุนฺติ วุตฺตสิกฺขาปทตฺตยํ ฯ อนฺโตรฏฺเฐ ตถา พหีติ อนฺโตรฏฺเฐ สาสงฺกสมฺมเต ติโรรฏฺเฐ สาสงฺกสมฺมเตติ วุตฺตสิกฺขาปททฺวยํ ฯ อนฺโตวสฺสํ จิตฺตาคารนฺติ อนฺโตวสฺสํ จาริกํ ปกฺกเมยฺย ราชาคารํ วา จิตฺตาคารํ วา ฯเปฯ โปกฺขรณึ วา ทสฺสนาย คจฺเฉยฺยาติ จ วุตฺตสิกฺขาปททฺวยํ ฯ อาสนฺทิ สุตฺตกนฺตนาติ อาสนฺทึ วา ปลฺลงฺกํ วา ปริภุญฺเชยฺย สุตฺตํ กนฺเตยฺยาติ วุตฺตสิกฺขาปททฺวยํ ฯ เวยฺยาวจฺจํ สหตฺถา จาติ คิหิเวยฺยาวจฺจํ กเรยฺย อาคาริกสฺส วา ปริพฺพาชกสฺส วา ปริพฺพาชิกาย วา สหตฺถา ขาทนียํ วา โภชนียํ วา ทเทยฺยาติ วุตฺตสิกฺขาปททฺวยํ ฯ อภิกฺขุกาวาเสน จาติ อภิกฺขุเก อาวาเส วสฺสํ วเสยฺยาติ อิทเมตํ สนฺธาย วุตฺตํ ฯ ฉตฺตํ ยานญฺจ สงฺฆาณินฺติ ฉตฺตุปาหนํ ธาเรยฺย ยาเนน ยาเยยฺย สงฺฆาณึ ธาเรยฺยาติ วุตฺตสิกฺขาปทตฺตยํ ฯ อลงฺการํ คนฺธวาสิตนฺติ อิตฺถาลงฺการํ ธาเรยฺย คนฺธวณฺณเกน นหาเยยฺย วาสิตเกน ปิญฺญาเกน นหาเยยฺยาติ วุตฺตสิกฺขาปทตฺตยํ ฯ ภิกฺขุนีติอาทินา ภิกฺขุนิยา อุมฺมทฺทาเปยฺยาติอาทีนิ จตฺตาร สิกฺขาปทานิ วุตฺตานิ ฯ อสงฺกจฺฉิกา อาปตฺตีติ อสงฺกจฺฉิกา คามํ ปวิเสยฺย ปาจิตฺติยนฺติ เอวํ วุตฺตา อาปตฺติ ฯ จตฺตารีสา จตุตฺตรีติ เอตานิ สพฺพานิ จตุจตฺตาฬีส สิกฺขาปทานิ ฯ กาเยน น วาจาจิตฺเตน กายจิตฺเตน น วาจโตติ กาเยน เจว กายจิตฺเตน จ สมุฏฺฐหนฺติ น วาจาจิตฺเตน น วาจโตติ อตฺโถ ฯ ทฺวิสมุฏฺฐานิกา สพฺเพ สมา เอฬกโลมกาติ อิทํ อุตฺตานตฺถเมว ฯ