{๒๖๔} ปทญฺญตฺร อสมฺมตาติ ปทโส ธมฺมํ มาตุคามสฺส อุตฺตรึ ฉปฺปญฺจวาจาหิ ธมฺมํ เทเสยฺย อญฺญตฺร วิญฺญุนา ปุริสวิคฺคเหน อสมฺมโต ภิกฺขุนิโย โอวเทยฺยาติ วุตฺตสิกฺขาปทตฺตยํ ฯ ตถา อตฺถงฺคเตน จาติ อตฺถงฺคเต สุริเย โอวเทยฺยาติ อิทเมตํ สนฺธาย วุตฺตํ ฯ ติรจฺฉานวิชฺชา เทฺวติ ติรจฺฉานวิชฺชํ ปริยาปุเณยฺย ติรจฺฉานวิชฺชํ วาเจยฺยาติ เอวํ วุตฺตสิกฺขาปททฺวยํ ฯ อโนกาเส จ ปุจฺฉนาติ อโนกาสกตภิกฺขุํ ปญฺหํ ปุจฺเฉยฺยาติ อิทเมตํ สนฺธาย วุตฺตํ ฯ

{๒๖๕} อทฺธานนาวํ ปณีตนฺติ ภิกฺขุนิยา สทฺธึ สํวิธาย เอกทฺธานมคฺคํ ปฏิปชฺเชยฺย เอกํ นาวํ อภิรูเหยฺย ปณีตโภชนานิ อคิลาโน อตฺตโน อตฺถาย วิญฺญาเปตฺวา ภุญฺเชยฺยาติ วุตฺตสิกฺขาปทตฺตยํ ฯ มาตุคาเมน สงฺฆเรติ มาตุคาเมน สทฺธึ สํวิธาย คมนญฺจ สมฺพาเธ โลมํ สํหเรยฺยาติ วุตฺตสิกฺขาปทญฺจ ฯ ธญฺญํ นิมนฺติตา เจวาติ ธญฺญํ วิญฺญาเปตฺวา วาติ จ นิมนฺติตา วา ปวาริตา วา ขาทนียํ วา โภชนียํ วา ขาเทยฺย วา ภุญฺเชยฺย วาติ วุตฺตสิกฺขาปทญฺจ ฯ อฏฺฐ จาติ ภิกฺขุนีนํ วุตฺตา อฏฺฐ ปาฏิเทสนียา ฯ

{๒๖๖} เถยฺยสตฺถํ อุปสฺสุตีติ เถยฺยสตฺเถน สทฺธึ สํวิธาย เอกทฺธานมคฺคคมนญฺจ อุปสฺสุตึ ติฏฺฐนญฺจ ฯ สูปวิญฺญาปเนน จาติ อิทํ สูโปทนวิญฺญตฺตึ สนฺธาย วุตฺตํ ฯ รตฺติ ฉนฺนญฺจ โอกาสนฺติ รตฺตนฺธกาเร อปฺปทีเป ปฏิจฺฉนฺเน โอกาเส อชฺโฌกาเส ปุริเสน สทฺธินฺติ เอวํ วุตฺตสิกฺขาปทตฺตยํ ฯ พฺยูเหน สตฺตมาติ อิทํ ตทนนฺตรเมว รถิกาย วา พฺยูเห วา ปุริเสน สทฺธินฺติ อาคตสิกฺขาปทํ สนฺธาย วุตฺตํ ฯ

{๒๖๗} ธมฺมเทสนสมุฏฺฐานานิ เอกาทส อุตฺตานาเนว ฯ เอวํ ตาว สมฺภินฺนสมุฏฺฐานํ เวทิตพฺพํ ฯ นิยตสมุฏฺฐานํ ปน ติวิธํ ตํ เอเกกสฺเสว สิกฺขาปทสฺส โหติ ตํ วิสุํเยว ทสฺเสตุํ ภูตํ กาเยน ชายตีติอาทิ วุตฺตํ ฯ ตํ อุตฺตานเมว ฯ เนตฺติธมฺมานุโลมิกนฺติ วินยปาลิธมฺมสฺส อนุโลมนฺติ ฯ