ปริกฺขารจตุกฺเก ฯ ปฐโม สกปริกฺขาโร ฯ ทุติโย สงฺฆิโก ฯ ตติโย เจติยสนฺตโก ฯ จตุตฺโถ คิหิปริกฺขาโร ฯ สเจ ปน โส ปตฺตจีวรนวกมฺมเภสชฺชานํ อตฺถาย อาหโฏ โหติ ฯ อปาปุรณํ ทาตุํ อนฺโต วสาเปตุํ จ วฏฺฏติ ฯ

สมฺมุขจตุกฺเก ฯ ปาปิกาย ทิฏฺฐิยา อปฺปฏินิสฺสคฺคาปตฺตึ สงฺฆสฺส สมฺมุขาเอว อาปชฺชติ ฯ วุฏฺฐานกาเล ปน สงฺเฆน กิจฺจํ นตฺถีติ ปรมฺมุขา วุฏฺฐาติ ฯ วิสฏฺฐิอาทิกํ ปรมฺมุขา อาปชฺชติ สงฺฆสฺส สมฺมุขา วุฏฺฐาติ ฯ สมนุภาสนํ สงฺฆสฺส สมฺมุขา เอว อาปชฺชติ สมฺมุขา วุฏฺฐาติ ฯ เสสํ สมฺปชานมุสาวาทาทิเภทํ ปรมฺมุขาว อาปชฺชติ ปรมฺมุขา จ วุฏฺฐาติ ฯ อชานนฺตจตุกฺกํ อจิตฺตกจตุกฺกสทิสํ ฯ

ลิงฺคปาตุภาเวนาติ สยิตสฺเสว ภิกฺขุสฺส วา ภิกฺขุนิยา วา ลิงฺคปริวตฺเต ชาเต สหาคารเสยฺยาปตฺติ โหติ ฯ อิทเมว ตํ ปฏิจฺจ วุตฺตํ ฯ อุภินฺนํปิ ปน อสาธารณาปตฺติ ลิงฺคปาตุภาเวน วุฏฺฐาติ ฯ สห ปฏิลาภจตุกฺเก ฯ ยสฺส ภิกฺขุโน ลิงฺคํ ปริวตฺตติ โส สห ลิงฺคปฏิลาเภน ปฐมํ อุปฺปนฺนวเสน เสฏฺฐภาเวน จ ปุริมํ ปุริสลิงฺคํ ชหติ ปจฺฉิเม อิตฺถีลิงฺเค ปติฏฺฐาติ ฯ ปุริสกุตฺตปุริสาการาทิวเสน ปวตฺตา กายวจีวิญฺญตฺติโย ปฏิปฺปสฺสมฺภนฺติ ฯ ภิกฺขูติ วา ปุริโสติ วา เอวํ ปวตฺตา ปณฺณตฺติโย นิรุชฺฌนฺติ ฯ ยานิ หิ ภิกฺขุนีหิ อสาธารณานิ ฉจตฺตาฬีส สิกฺขาปทานิ เตหิ อนาปตฺติเยว โหติ ฯ ทุติยจตุกฺเก ปน ยสฺสา ภิกฺขุนิยา ลิงฺคํ ปริวตฺตติ สา ปจฺฉา สมุปฺปตฺติยา วา หีนภาเวน วา ปจฺฉิมนฺติ สงฺขคตํ อิตฺถีลิงฺคํ ชหติ วุตฺตปฺปกาเรน ปุริมนฺติ สงฺขคเต ปุริสลิงฺเค ปติฏฺฐาติ ฯ วุตฺตวิปรีตา วิญฺญตฺติโย ปฏิปฺปสฺสมฺภนฺติ ฯ ภิกฺขุนีติ วา อิตฺถีติ วา เอวํ ปวตฺตา ปณฺณตฺติโย นิรุชฺฌนฺติ ฯ ยานิ วา ภิกฺขูหิ อสาธารณานิ สตํ ตึสญฺจ สิกฺขาปทานิ เตหิ อนาปตฺติเยว โหติ ฯ จตฺตาโร สามุกฺกํสาติ จตฺตาโร มหาปเทสา ฯ เต หิ ภควตา อนุปฺปนฺเน วตฺถุสฺมึ สยํ อุกฺกํสิตฺวา อุกฺขิปิตฺวา ฐปิตตฺตา สามุกฺกํสาติ วุจฺจนฺติ ฯ ปริโภคาติ อชฺโฌหรณียปริโภคา ฯ อุทกํ ปน อกาลิกตฺตา อปฺปฏิคฺคหิตกํ วฏฺฏติ ฯ ยาวกาลิกาทีนิ อปฺปฏิคฺคหิตกานิ อชฺโฌหริตุํ น วฏฺฏนฺติ ฯ จตฺตาริ มหาวิกฏานิ กาโลทิสฺสตฺตา ยถาวุตฺตกาเล วฏฺฏนฺติ ฯ อุปาสโก สีลวาติ ปญฺจ วา ทส วา สีลานิ โคปยมาโน ฯ