อาคนฺตุกาทิจตุกฺเก ฯ สฉตฺตุปาหโน สสีสํ ปารุปนฺโต วิหารํ ปวิสนฺโต ตตฺถ วิจรนฺโต จ อาคนฺตุโกว อาปชฺชติ โน อาวาสิโก ฯ อาวาสิกวตฺตํ อกโรนฺโต ปน อาวาสิโก อาปชฺชติ โน อาคนฺตุโก ฯ เสสํ กายวจีทฺวาริกํ อาปตฺตึ อุโภปิ อาปชฺชนฺติ ฯ อสาธารณํ อาปตฺตึ เนว อาคนฺตุโก อาปชฺชติ โน อาวาสิโก ฯ คมิยจตุกฺเกปิ ฯ คมิยวตฺตํ อปูเรตฺวา คจฺฉนฺโต คมิโก อาปชฺชติ โน อาวาสิโก ฯ อาวาสิกวตฺตํ อกโรนฺโต อาวาสิโก อาปชฺชติ โน คมิโก ฯ เสสํ อุโภปิ อาปชฺชนฺติ ฯ อสาธารณํ อาปตฺตึ อุโภปิ นาปชฺชนฺติ ฯ

วตฺถุนานตฺตตาทิจตุกฺเก ฯ จตุนฺนํ ปาราชิกานํ อญฺญมญฺญํ วตฺถุนานตฺตตาว โหติ น อาปตฺตินานตฺตตา ฯ สพฺพาปิ หิ สา ปาราชิกาปตฺติเยว ฯ สงฺฆาทิเสสาทีสุปิ เอเสว นโย ฯ ภิกฺขุสฺส จ ภิกฺขุนิยา จ อญฺญมญฺญํ กายสํสคฺเค ภิกฺขุสฺส สงฺฆาทิเสโส ภิกฺขุนิยา ปาราชิกนฺติ เอวํ อาปตฺตินานตฺตตาว โหติ น วตฺถุนานตฺตตา ฯ อุภินฺนํปิ กายสํสคฺโคว วตฺถุ ฯ ตถา ลสุณขาทเน ภิกฺขุนิยา ปาจิตฺติยํ ภิกฺขุสฺส ทุกฺกฏนฺติเอวมาทินา เจตฺถ นเยน โยชนา เวทิตพฺพา ฯ จตุนฺนํ ปาราชิกานํ เตรสหิ สงฺฆาทิเสเสหิ สทฺธึ วตฺถุนานตฺตตา เจว อาปตฺตินานตฺตตา จ ฯ เอวํ สงฺฆาทิเสสาทีนํ อนิยตาทีหิ ฯ อาทิโต จตฺตาริ ปาราชิกานิ เอกโต อาปชฺชนฺตานํ ภิกฺขุภิกฺขุนีนํ เนว วตฺถุนานตฺตตา โน อาปตฺตินานตฺตตา ฯ วิสุํ อาปชฺชนฺเตสุปิ เสสา สาธารณาปตฺติโย อาปชฺชนฺเตสุปิ เอเสว นโย ฯ วตฺถุสภาคาทิจตุกฺเก ฯ ภิกฺขุสฺส จ ภิกฺขุนิยา จ กายสํสคฺเค วตฺถุสภาคตา โน อาปตฺติสภาคตา ฯ จตูสุ ปาราชิเกสุ อาปตฺติสภาคตา โน วตฺถุสภาคตา ฯ เอเสว นโย สงฺฆาทิเสสาทีสุ ฯ ภิกฺขุสฺส จ ภิกฺขุนิยา จ จตูสุ ปาราชิเกสุ วตฺถุสภาคตา เจว อาปตฺติสภาคตา จ ฯ เอส นโย สพฺพาสุ สาธารณาปตฺตีสุ ฯ อสาธารณาปตฺติยํ เนว วตฺถุสภาคตา จ นาปตฺติสภาคตา จ ฯ โย หิ ปุริมจตุกฺเก ปฐมปญฺโห โส อิธ ทุติโย ฯ โย จ ตตฺถ ทุติโย โส อิธ ปฐโม ฯ ตติยจตุตฺเถสุ นานากรณํ นตฺถิ ฯ

อุปชฺฌายจตุกฺเก ฯ สทฺธิวิหาริกสฺส อุปชฺฌาเยน กตฺตพฺพ- วตฺตสฺส อกรเณ จ อาปตฺตึ อุปชฺฌาโย อาปชฺชติ โน สทฺธิวิหาริโก ฯ อุปชฺฌายสฺส กตฺตพฺพวตฺตํ อกโรนฺโต สทฺธิวิหาริโก อาปชฺชติ โน อุปชฺฌาโย ฯ เสสํ อุโภปิ อาปชฺชนฺติ ฯ อสาธารณํ อุโภปิ นาปชฺชนฺติ ฯ อาจริยจตุกฺเกปิ เอเสว นโย ฯ