อาทิยนฺตจตุกฺเก ฯ ปาทํ วา อติเรกปาทํ วา สหตฺถา อาทิยนฺโต ครุกํ อาปชฺชติ ฯ อูนกปาทํ คณฺหาหีติ อาณตฺติยา อญฺญํ ปโยเชนฺโต ลหุกํ อาปชฺชติ ฯ เอเตน นเยน เสสปทตฺติยํ เวทิตพฺพํ ฯ อภิวาทนารหจตุกฺเก ฯ ภิกฺขุนีนํ ตาว ภตฺตคฺเค นวมภิกฺขุนิโต ปฏฺฐาย อุปชฺฌายาปิ อภิวาทนารหา โน ปจฺจุปฏฺฐานารหา ฯ อวิเสเสน จ วิปฺปกตโภชนสฺส ภิกฺขุสฺส โย โกจิ วุฑฺฒตโร ฯ สฏฺฐิวสฺสสฺสาปิ ปาริวาสิกสฺส สมีปํ คโต ตทหุปสมฺปนฺโนปิ ปจฺจุปฏฺฐานารโห โน อภิวาทนารโห ฯ อปฺปฏิกฺขิตฺเตสุ ฐาเนสุ วุฑฺโฒ นวกสฺส อภิวาทนารโห เจว ปจฺจุปฏฺฐานารโห จ ฯ นวโก ปน วุฑฺฒสฺส เนว อภิวาทนารโห น ปจฺจุปฏฺฐานารโห ฯ อาสนารหจตุกฺกสฺส ปฐมปทํ ปุริมจตุกฺเก ทุติยปเทน ทุติยปทญฺจ ปฐมปเทน อตฺถโต สทิสํ ฯ

กาลจตุกฺเก ฯ ปวาเรตฺวา ภุญฺชนฺโต กาเล อาปชฺชติ โน วิกาเล ฯ วิกาลโภชนาปตฺตึ วิกาเล อาปชฺชติ โน กาเล ฯ เสสํ กาเล เจว วิกาเล จ ฯ อสาธารณํ เนว กาเล โน วิกาเล ฯ ปฏิคฺคหิตจตุกฺเก ฯ ปุเรภตฺตํ ปฏิคฺคหิตามิสํ กาเล กปฺปติ โน วิกาเล ฯ ปานกํ วิกาเล กปฺปติ ปุนทิวสมฺหิ โน กาเล ฯ สตฺตาหกาลิกํ ยาวชีวิกํ กาเล เจว กปฺปติ วิกาเล จ ฯ อตฺตโน อตฺตโน กาลาตีตํ ยาวกาลิกาทิตฺตยํ อกปฺปิยมํสอุคฺคหิตก- ปฏิคฺคหิตกญฺจ เนว กาเล กปฺปติ โน วิกาเล ฯ ปจฺจนฺติมจตุกฺเก ฯ สมุทฺเท สีมํ พนฺธนฺโต ปจฺจนฺติเมสุ ชนปเทสุ อาปชฺชติ โน มชฺฌิเมสุ ฯ ปญฺจวคฺเคน คเณน อุปสมฺปาเทนฺโต คณงฺคณุปาหนธุวนหานจมฺมตฺถรณานิ จ มชฺฌิเมสุ ชนปเทสุ อาปชฺชติ โน ปจฺจนฺติเมสุ ฯ อิมานิ จตฺตาริ อิธ น กปฺปนฺตีติ วทนฺโตปิ ปจฺจนฺติเมสุ อาปชฺชติ ฯ อิธ กปฺปนฺตีติ วทนฺโต ปน มชฺฌิเมสุ อาปชฺชติ ฯ เสสาปตฺตึ อุภยตฺถาปิ อาปชฺชติ ฯ อสาธารณํ น กตฺถจิ อาปชฺชติ ฯ ทุติยจตุกฺเก ฯ ปญฺจวคฺเคน คเณน อุปสมฺปทาทิจตุพฺพิธํปิ วตฺถุ ปจฺจนฺติเมสุ ชนปเทสุ กปฺปติ ฯ อิทํ กปฺปตีติ ทีเปตุํปิ ตตฺเถว กปฺปติ โน มชฺฌิเมสุ ฯ อิทํ น กปฺปตีติ ทีเปตุํ ปน มชฺฌิเมสุ ชนปเทสุ กปฺปติ โน ปจฺจนฺติเมสุ ฯ เสสํ อนุชานามิ ภิกฺขเว ปญฺจ โลณานีติอาทิ อนุญฺญาตํ ฯ ตํ อุภยตฺถ กปฺปติ ฯ ยํ ปน อกปฺปิยนฺติ ปฏิกฺขิตฺตํ ตํ อุภยตฺถาปิ น กปฺปติ ฯ อนฺโตอาทิจตุกฺเก ฯ อนูปขชฺชเสยฺยาทึ อนฺโต อาปชฺชติ โน พหิ ฯ อชฺโฌกาเส สงฺฆิกมญฺจาทีนิ นิกฺขิปิตฺวา ปกฺกมนฺโต พหิ อาปชฺชติ โน อนฺโต ฯ เสสํ อนฺโต เจว พหิ จ ฯ อสาธารณํ เนว อนฺโต น พหิ ฯ อนฺโตสีมาทิจตุกฺเก ฯ อาคนฺตุโก วตฺตํ น ปูเรนฺโต อนฺโต สีมาย อาปชฺชติ ฯ คมิโย พหิ สีมาย ฯ มุสาวาทาทึ อนฺโต สีมาย จ พหิ สีมาย จ อาปชฺชติ ฯ อสาธารณํ น กตฺถจิ ฯ คามจตุกฺเก ฯ อนฺตรฆรปฏิสํยุตฺตํ เสขปญฺญตฺตึ คาเม อาปชฺชติ โน อรญฺเญ ฯ ภิกฺขุนี อรุณํ อุฏฺฐาปยมานา อรญฺเญ อาปชฺชติ โน คาเม ฯ มุสาวาทาทึ คาเม เจว อาปชฺชติ อรญฺเญ จ ฯ อสาธารณํ น กตฺถจิ ฯ