ปรจิตฺตํ ปสีทตีติ เอตฺถ อิมานิ วตฺถูนิ ฯ ติสฺโส นาม ทหรภิกฺขุ ชมฺพุโกลเจติยงฺคณํ สมฺมชฺชิตฺวา สงฺการจฺฉฑฺฑนึ หตฺเถน คเหตฺวาว อฏฺฐาสิ ฯ ตสฺมึ ขเณ ติสฺสทตฺตตฺเถโร นาม นาวาโต โอรุยฺห เจติยงฺคณํ โอโลเกนฺโต ภาวิตจิตฺเตน สมฺมชฺชนฏฺฐานนฺติ ญตฺวา ปญฺหาสหสฺสํ ปุจฺฉิ ฯ อิตโร สพฺพํ วิสฺสชฺเชสิ ฯ อญฺญตรสฺมึปิ วิหาเร เถโร เจติยงฺคณํ สมฺมชฺชิตฺวา วตฺตํ ปริจฺฉินฺทิ ฯ โยนกวิสยโต เจติยํ วนฺทกา จตฺตาโร เถรา อาคนฺตฺวา เจติยงฺคณํ ทิสฺวา อนฺโต อปฺปวิสิตฺวา ทฺวาเรเยว ฐตฺวา เอโก เถโร อฏฺฐ กปฺเป อนุสฺสริ เอโก โสฬส กปฺเป เอโก วีสติ กปฺเป เอโก ตึส กปฺเป อนุสฺสริ ฯ เทวตา อตฺตมนา โหนฺตีติ เอตฺถ อิทํ วตฺถุ ฯ เอกสฺมึ กิร วิหาเร เอโก ภิกฺขุ เจติยงฺคณญฺจ โพธิยงฺคณญฺจ สมฺมชฺชิตฺวา นหายิตุํ คโต ฯ เทวตา อิมสฺส วิหารสฺส กตกาลโต ปฏฺฐาย เอวํ วตฺตํ ปูเรตฺวา สมฺมชฺชปุพฺโพ ภิกฺขุ นตฺถีติ ปสนฺนจิตฺตา อาคนฺตฺวา ปุปฺผหตฺถา อฏฺฐํสุ ฯ เถโร อาคนฺตฺวา กตรคามวาสิกตฺถาติ อาห ฯ ภนฺเต อิเธว วสาม อิมสฺส วิหารสฺส กตกาลโต ปฏฺฐาย เอวํ วตฺตํ ปูเรตฺวา สมฺมชฺชปุพฺโพ ภิกฺขุ นตฺถีติ ตุมฺหากํ ภนฺเต วตฺเต ปสีทิตฺวา ปุปฺผหตฺถา ฐิตมฺหาติ เทวตา อาหํสุ ฯ ปสาทิกสํวตฺตนิยนฺติ เอตฺถ อิทํ วตฺถุ ฯ เอกํ กิร อมจฺจปุตฺตํ อภยตฺเถรญฺจ อารพฺภ อยํ กถา อุทปาทิ กินฺนุ โข อมจฺจปุตฺโต ปาสาทิโก อภยตฺเถโรติ อุโภปิ เน เอกสฺมึ ฐาเน โอโลเกสฺสามาติ ญาตกา อมจฺจปุตฺตํ อลงฺกริตฺวา มหาเจติยํ วนฺทาเปสฺสามาติ อคมํสุ ฯ เถรมาตาปิ ปาสาทิกํ จีวรํ กาเรตฺวา ปุตฺตสฺส ปหิณิ ปุตฺโต เม เกเส ฉินฺทาเปตฺวา อิมํ จีวรํ ปารุปิตฺวา ภิกฺขุสงฺฆปริวุโต มหาเจติยํ วนฺทตูติ ฯ อมจฺจปุตฺโต ญาติปริวุโต ปาจีนทฺวาเรน เจติยงฺคณํ อารูฬฺโห ฯ อภยตฺเถโร ภิกฺขุสงฺฆปริวุโต ทกฺขิณทฺวาเรน เจติยงฺคณํ อารูหิตฺวา เจติยงฺคเณ เตน สทฺธึ สมาคนฺตฺวา อาห กึ ตฺวํ อาวุโส มหลฺลกตฺเถรสฺส สมฺมชฺชนฏฺฐาเน กจวรํ ฉฑฺเฑตฺวา มยา สทฺธึ ยุคคาหํ คณฺหสีติ ฯ อตีตตฺตภาเว กิร อภยตฺเถโร มหลฺลกตฺเถโร นาม หุตฺวา กาชรคาเม เจติยงฺคณํ สมฺมชฺชิ ฯ อมจฺจปุตฺโต มหาอุปาสโก หุตฺวา สมฺมชฺชนฏฺฐาเน กจวรํ คเหตฺวา ฉฑฺเฑสิ ฯ

สตฺถุ สาสนํ กตํ โหตีติ อิทํ สมฺมชฺชนวตฺตํ นาม พุทฺเธหิ วณฺณิตํ ฯ ตสฺมา ตํ กโรนฺเตน สตฺถุ สาสนํ กตํ โหติ ฯ ตตฺรีทํ วตฺถุ ฯ อายสฺมา กิร สารีปุตฺโต หิมวนฺตํ คนฺตฺวา เอกสฺมึ ปพฺภาเร อสมฺมชฺชิตฺวาว นิโรธํ สมาปชฺชิตฺวา นิสีทิ ฯ ภควา อาวชฺเชนฺโต เถรสฺส อสมฺมชฺชิตฺวา นิสินฺนภาวํ ญตฺวา อากาเสนาคนฺตฺวา เถรสฺส ปุรโต อสมฺมชฺชนฏฺฐาเน ปทานิ ทสฺเสตฺวา ปจฺจาคญฺฉิ ฯ เถโร สมาปตฺติโต วุฏฺฐิโต ภควโต ปทานิ ทิสฺวา พลวหิโรตฺตปฺปํ ปจฺจุปฏฺฐเปตฺวา ชณฺณุเกหิ ปติฏฺฐาย อสมฺมชฺชิตฺวา นิสินฺนภาวํ วต เม สตฺถา อญฺญาสิ สงฺฆมชฺเฌทานิ โจทนํ กาเรสฺสามีติ ทสพลสฺส สนฺติกํ คนฺตฺวา วนฺทิตฺวา นิสีทิ ฯ ภควา กุหึ คโตสิ สารีปุตฺตาติ วตฺวา น ปฏิรูปํทานิ เต มยฺหํ อนนฺตเร ฐาเน ฐตฺวา วิจรนฺตสฺส อสมฺมชฺชิตฺวา นิสีทิตุนฺติ อาห ฯ ตโต ปฏฺฐาย เถโร คณฺฐิกปฏิมุญฺจนฏฺฐาเนปิติฏฺฐนฺโตปาเทน กจวรํ วิยูหิตฺวา ติฏฺฐติ ฯ