อตฺตโน ภาสปริยนฺตํ น อุคฺคณฺหาตีติ อิมสฺมึ วตฺถุสฺมึ เอตฺตกํ สุตฺตํ อุปลพฺภติ เอตฺตโก วินิจฺฉโย เอตฺตกํ สุตฺตญฺจ วินิจฺฉยญฺจ วกฺขามีติ เอวํ อตฺตโน ภาสิตปริยนฺตํ น อุคฺคณฺหาติ ฯ อยํ โจทกสฺส ปุริมกถา อยํ ปจฺฉิมกถา อยํ จุทิตกสฺส ปุริมกถา อยํ ปจฺฉิมกถา เอตฺถ เอตฺตกํ คยฺหูปคํ เอตฺตกํ น คยฺหูปคนฺติ เอวํ อนุคฺคณฺหนฺโต ปน ปรสฺส ภาสปริยนฺตํ น อุคฺคณฺหาติ นาม ฯ อาปตฺตึ น ชานาตีติ ปาราชิกํ วา สงฺฆาทิเสสํ วาติ สตฺตนฺนํ อาปตฺติกฺขนฺธานํ นานากรณํ น ชานาติ ฯ มูลนฺติ เทฺว อาปตฺติยา มูลานิ กาโย จ วาจา จ ตานิ น ชานาติ ฯ สมุทยนฺติ ฉ อาปตฺติสมุฏฺฐานานิ อาปตฺติสมุทโย นาม ตานิ น ชานาติ ฯ ปาราชิกาทีนํ วตฺถุํ น ชานาตีติปิ วุตฺตํ โหติ ฯ นิโรธนฺติ อยํ อาปตฺติ เทสนาย นิรุชฺฌติ วูปสมฺมติ อยํ วุฏฺฐาเนนาติ เอวํ อาปตฺตินิโรธํ น ชานาติ ฯ สตฺต สมเถ น ชานนฺโต ปน อาปตฺตินิโรธคามินึ ปฏิปทํ น ชานาติ ฯ

อธิกรณปญฺจเก ฯ อธิกรณํ นาม จตฺตาริ อธิกรณานิ ฯ อธิกรณสฺส มูลํ นาม เตตฺตึส มูลานิ ฯ วิวาทาธิกรณสฺส ทฺวาทส มูลานิ ฯ อนุวาทาธิกรณสฺส จุทฺทส ฯ อาปตฺตาธิกรณสฺส ฉ ฯ กิจฺจาธิกรณสฺส เอกํ ฯ ตานิ ปรโต อาวิภวิสฺสนฺติ ฯ อธิกรณสมุทโย นาม อธิกรณสมุฏฺฐานํ ฯ วิวาทาธิกรณํ อฏฺฐารส เภทกรวตฺถูนิ นิสฺสาย อุปฺปชฺชติ อนุวาทาธิกรณํ จตสฺโส วิปตฺติโย อาปตฺตาธิกรณํ สตฺตาปตฺติกฺขนฺเธ กิจฺจาธิกรณํ จตฺตาริ สงฺฆกิจฺจานีติ อิมํ วิภาคํ น ชานาตีติ อตฺโถ ฯ อธิกรณนิโรธํ น ชานาตีติ ธมฺเมน วินเยน สตฺถุสาสเนน มูลามูลํ คนฺตฺวา วินิจฺฉยํ สมถํ ปาเปตุํ น สกฺโกติ ฯ อิทํ อธิกรณํ ทฺวีหิ อิทํ จตูหิ อิทํ ตีหิ อิทํ เอเกน สมเถน สมฺมตีติ เอวํ สตฺต สมเถ อชานนฺโต ปน อธิกรณนิโรธคามินึ ปฏิปทํ น ชานาติ นาม ฯ วตฺถุํ น ชานาตีติ อิทํ ปาราชิกสฺส วตฺถุ อิทํ สงฺฆาทิเสสสฺสาติ เอวํ สตฺตนฺนํ อาปตฺติกฺขนฺธานํ วตฺถุํ น ชานาติ ฯ นิทานนฺติ สตฺตนฺนํ นครานํ อิทํ สิกฺขาปทํ เอตฺถ ปญฺญตฺตํ อิทํ เอตฺถาติ น ชานาติ ฯ ปญฺญตฺตึ น ชานาตีติ ตสฺมึ ตสฺมึ สิกฺขาปเท ปฐมปญฺญตฺตึ น ชานาติ ฯ อนุปญฺญตฺตินฺติ ปุนปฺปุนํ ปญฺญตฺตึ น ชานาติ ฯ อนุสนฺธิวจนปถนฺติ กถานุสนฺธิวินิจฺฉยานุสนฺธิวเสน วตฺตุํ น ชานาติ ฯ ญตฺตึ น ชานาตีติ สพฺเพน สพฺพํ ญตฺตึ น ชานาติ ฯ ญตฺติยา กรณํ น ชานาตีติ ญตฺติกิจฺจํ น ชานาติ ฯ โอสารณาทีสุ นวสุ ฐาเนสุ ญตฺติกมฺมํ นาม โหติ ฯ ญตฺติทุติยญตฺติจตุตฺถกมฺเมสุ ญตฺติยา กมฺมปฺปตฺโต หุตฺวา ติฏฺฐตีติ น ชานาติ ฯ น ปุพฺพกุสโล โหติ น อปรกุสโลติ ปุพฺเพ กเถตพฺพญฺจ ปจฺฉา กเถตพฺพญฺจ น ชานาติ ญตฺติ นาม ปุพฺเพ ฐเปตพฺพา ปจฺฉา น ฐเปตพฺพาติปิ น ชานาติ ฯ อกาลญฺญู จ โหตีติ กาลํ น ชานาติ อนชฺฌิฏฺโฐ อยาจิโต ภาสติ ญตฺติกาลํปิ ญตฺติกฺเขตฺตํปิ ญตฺติโอกาสํปิ น ชานาติ ฯ