{๓๖๗} อนุโยควตฺตคาถาสุ ปฐมคาถา วุตฺตตฺถา เอว ฯ วตฺถุํ วิปตฺตึ อาปตฺตึ นิทานํ อาการอโกวิโท ปุพฺพาปรํ น ชานาตีติ วตฺถุนฺติอาทีนํ น ชานาติปเทน สมฺพนฺโธ ฯ อโกวิโทติ ปทสฺส สเว ตาทิสโกติ อิมินา สมฺพนฺโธ ฯ ตสฺมา อยเมตฺถ โยชนา ฯ โย ภิกฺขุ ปาราชิกาทีนํ วตฺถุํ น ชานาติ จตุพฺพิธํ วิปตฺตึ น ชานาติ สตฺตวิธํ อาปตฺตึ น ชานาติ อิมํ สิกฺขาปทํ อมุกสฺมึ นาม นคเร ปญฺญตฺตนฺติ เอวํ นิทานํ น ชานาติ ฯ อิทํ ปุริมวจนํ อิทํ ปจฺฉิมวจนนฺติ ปุพฺพาปรํ น ชานาติ ฯ อิทํ กตํ อิทํ อกตนฺติ กตากตํ น ชานาติ ฯ สเมน จาติ เตเนว ปุพฺพาปรํ อชานนฺตสฺส สเมน อญฺญาเณน กตากตํ น ชานาตีติ วุตฺตํ โหติ ฯ เอวํ ตาว น ชานาติปเทน สทฺธึ สมฺพนฺโธ เวทิตพฺโพ ฯ ยํ ปเนตํ อาการอโกวิโทติ วุตฺตํ ฯ ตตฺถ อาการอโกวิโทติ การณาการเณ อโกวิโท ฯ อิติ ยฺวายํ วตฺถุอาทีนิ จ น ชานาติ อาการสฺส จ อโกวิโท สเว ตาทิสโก ภิกฺขุ อปฺปฏิกฺโขติ วุจฺจติ ฯ กมฺมญฺจ อธิกรณญฺจาติ อิเมสํปิ ปทานํ น ชานาติปเทเนว สมฺพนฺโธ ฯ อยํ ปเนตฺถ โยชนา ฯ ตเถว ยฺวายํ กมฺมญฺจ น ชานาติ อธิกรณญฺจ น ชานาติ ฯ สตฺตปฺปกาเร สมเถ จาปิ อโกวิโท ราคาทีหิ ปน รตฺโต ทุฏฺโฐ จ มูฬฺโห จ ภเยน ภยา คจฺฉติ สมฺโมเหน โมหา คจฺฉติ รตฺตตฺตา ปน ทุฏฺฐตฺตา จ ฉนฺทา โทสา คจฺฉติ ฯ ปรํ สญฺญาเปตุํ อสมตฺถตาย น จ สญฺญตฺติกุสโล ฯ การณาการณทสฺสเน อสมตฺถตาย นิชฺฌตฺติยา จ อโกวิโท ฯ อตฺตโน สทิสาย ปริสาย ลทฺธตฺตา ลทฺธปกฺโข หิริยา ปริพาหิรตฺตา อหิริโก กาฬเกหิ กมฺเมหิ สมนฺนาคตตฺตา กณฺหกมฺโม ธมฺมาทริย- ปุคฺคลาทริยานํ อภาวโต อนาทโร ฯ สเว ตาทิสโก ภิกฺขุ อปฺปฏิกฺโขติ วุจฺจติ ฯ นปฺปฏิกฺขิตพฺโพ น โอโลเกตพฺโพ ฯ น สมฺมนฺนิตฺวา อิสฺสริยาธิปจฺจเชฏฺฐกฏฺฐาเน ฐเปตพฺโพติ อตฺโถ ฯ สุกฺกปกฺขคาถานํปิ โยชนานโย วุตฺตนเยเนว เวทิตพฺโพติ ฯ

จูฬสงฺคามวณฺณนา นิฏฺฐิตา ฯ