{๔๖๗} กฐินตฺถารวคฺเค ฯ โอตมสิโกติ อนฺธการคโต ฯ ตํ หิ วนฺทนฺตสฺส มญฺจปาทาทีสุปิ นลาฏํ ปฏิหญฺเญยฺย ฯ อสมนฺนาหรนฺโตติ กิจฺจปสุตตฺตา วนฺทนํ อสมนฺนาหรนฺโต ฯ สุตฺโตติ นิทฺทํ โอกฺกนฺโต ฯ เอกาวตฺโตติ เอกโต อาวตฺโต สปตฺตปกฺเข ฐิโต เวรี วิสภาคปุคฺคโล วุจฺจติ อยํ อวนฺทิโย ฯ อยํ หิ วนฺทิยมาโน ปาเทนปิ ปหเรยฺย ฯ อญฺญาวิหิโตติ อญฺญํ จินฺตยมาโน ฯ

ขาทนฺโตติ ปิฏฺฐขชฺชกาทีนิ ขาทนฺโต ฯ อุจฺจารํ จ ปสฺสาวํ จ กโรนฺโต อโนกาสคตตฺตา อวนฺทิโย ฯ อุกฺขิตฺตโกติ ติวิเธนปิ อุกฺเขปนียกมฺเมน อุกฺขิตฺตโก อวนฺทิโย ฯ ตชฺชนียาทิกมฺมกตา ปน จตฺตาโร วนฺทิตพฺพา ฯ อุโปสถปวารณาปิ เตหิ สทฺธึ ลพฺภนฺติ ฯ อาทิโต ปฏฺฐาย จ วุตฺเตสุ อวนฺทิเยสุ นคฺคญฺจ อุกฺขิตฺตกํ จ วนฺทนฺตสฺเสว อาปตฺติ อิตเรสํ ปน อสารุปฺปตฺเถน จ อนฺตรา วุตฺตการเณน จ วนฺทนา ปฏิกฺขิตฺตา ฯ อิโต ปรํ ปจฺฉา อุปสมฺปนฺนาทโย ทสปิ อาปตฺติวตฺถุภาเวเนว อวนฺทิยา ฯ เต วนฺทนฺตสฺส หิ นิยเมเนว อาปตฺติ ฯ อิติ อิเมสุ ปญฺจสุ ปญฺจเกสุ เตรส ชเน วนฺทนฺตสฺส อนาปตฺติ ฯ ทฺวาทสนฺนํ วนฺทนฺตสฺส อาปตฺติ ฯ

{๔๖๘} อาจริโย วนฺทิโยติ ปพฺพชฺชาจริโย อุปสมฺปทาจริโย นิสฺสยาจริโย อุทฺเทสาจริโย โอวาทาจริโยติ อยํ ปญฺจวิโธปิ อาจริโย วนฺทิโย ฯ เสสํ สพฺพตฺถ อุตฺตานเมวาติ ฯ

กฐินตฺถารวคฺควณฺณนา นิฏฺฐิตา ฯ