{331} Ekādasakesu. Ekādasāti paṇḍakādayo ekādasa. Ekādasa pādukāti dasa ratanamayā ekā kaṭṭhapādukā tiṇapādukā muñjapādukā pabbajapādukādayo pana kaṭṭhapādukasaṅgahameva gacchanti. Ekādasa pattāti tambalohamayena vā dārumayena vā saddhiṃ dasa ratanamayā. Ekādasa cīvarānīti sabbanīlakādīni. Ekādasa yāvatatiyakāti ukkhittānuvattikā bhikkhunī saṅghādisesā aṭṭha ariṭṭho caṇḍakāḷīti. Ekādasa antarāyikā nāma na sīmanimittātiādayo. Ekādasa cīvarāni adhiṭṭhātabbānīti ticīvaraṃ vassikasāṭikā nisīdanaṃ paccattharaṇaṃ kaṇḍupaṭicchādi mukhapuñchanacoḷaṃ parikkhāracoḷaṃ udakasāṭikā saṅkacchikāti. Na vikappetabbānīti etāneva adhiṭṭhitakālato paṭṭhāya na vikappetabbāni. Gaṇṭhikā ca vīthā ca suttamayena saddhiṃ ekādasa honti. Te sabbe khuddakakkhandhake niddiṭṭhā. Paṭhaviyo paṭhavisikkhāpade niddiṭṭhā. Nissayapaṭipassaddhiyo upajjhāyamhā pañca ācariyamhā cha evaṃ ekādasa. Avandiyapuggalā naggena saddhiṃ ekādasa te sabbe senāsanakkhandhake niddiṭṭhā. Ekādasa paramāni pubbe vuttesu cuddasasu ekādasakavasena yojetvā veditabbāni. Ekādasa varānīti mahāpajāpatiyā yācitavarena saddhiṃ pubbe vuttāni dasa. Ekādasa sīmādosā atikhuddakasīmaṃ sammannantītiādinā nayena kammavagge āgamissanti. Akkosakaparibhāsake puggale ekādasādīnavā nāma. Yo so bhikkhave bhikkhu akkosakaparibhāsako sabrahmacārīnaṃ ariyupavādī aṭṭhānametaṃ anavakāso yaṃ so ekādasannaṃ byasanānaṃ na aññataraṃ byasanaṃ nigaccheyya. Katamesaṃ ekādasannaṃ. Anadhigataṃ nādhigacchati adhigatā parihāyati saddhammassa na vodāyanti saddhammesu vā avamāniko hoti anabhirato vā brahmacariyaṃ carati aññataraṃ vā saṅkiliṭṭhaṃ āpattiṃ āpajjati sikkhaṃ vā paccakkhāya hīnāyāvattati gāḷhaṃ vā rogātaṅkaṃ phusati ummādaṃ vā pāpuṇāti cittakkhepaṃ sammūḷho kālaṃ karoti kāyassa bhedā parammaraṇā apāyaṃ duggatiṃ vinipātaṃ nirayaṃ upapajjatīti. Ettha ca saddhammoti buddhavacanaṃ adhippetaṃ. Āsevitāyāti ādito paṭṭhāya sevitāya. Bhāvitāyāti nipphāditāya vaḍḍhitāya vā.