Samuṭṭhānavaṇṇanā

{470} acittako āpajjatītiādīsu. Sahaseyyādipaṇṇattivajjaṃ asañcicca āpajjanto acittako āpajjati desento sacittako vuṭṭhāti. Yaṅkiñci sañcicca āpajjanto sacittako āpajjati. Tiṇavatthārakena vuṭṭhahanto acittako vuṭṭhāti. Pubbe vuttameva tiṇavatthārakena vuṭṭhahanto acittako āpajjati acittako vuṭṭhāti. Itaraṃ desento sacittako āpajjati sacittako vuṭṭhāti. Dhammadānaṃ karomīti padaso dhammādīni karonto kusalacitto āpajjati. Buddhānaṃ anusāsanaṃ karomīti udaggacitto desento kusalacitto vuṭṭhāti. Domanassito hutvā desento akusalacitto vuṭṭhāti. Tiṇavatthārakena niddāgato vuṭṭhahanto abyākatacitto vuṭṭhāti. Bhiṃsāpanādīni katvā buddhānaṃ sāsanaṃ karomīti somanassito desento akusalacitto āpajjati kusalacitto vuṭṭhāti. Domanassitova desento akusalacitto vuṭṭhāti. Vuttanayeneva tiṇavatthārakena vuṭṭhahanto abyākatacitto vuṭṭhāti. Niddokkantasamaye sahāgāraseyyaṃ āpajjanto abyākatacitto āpajjati. Vuttanayeneva panettha kusalacitto vuṭṭhātītiādi veditabbaṃ.

Paṭhamaṃ pārājikaṃ katīhi samuṭṭhānehītiādi pubbe vuttanayattā uttānameva.

{473} Cattāro pārājikā tīhi samuṭṭhānehītiādīsu ukkaṭṭhaparicchedato yaṃ yaṃ samuṭṭhānaṃ yassa yassa labbhati taṃ sabbaṃ vuttameva hoti.