{263} Eḷakalomā dve seyyāti eḷakalomasikkhāpadañceva dve ca sahaseyyasikkhāpadāni. Āhaccapiṇḍabhojananti āhaccapādaka- sikkhāpadañca āvasathapiṇḍabhojanasikkhāpadañca. Gaṇavikālasannidhīti gaṇabhojanavikālabhojanasannidhikārakasikkhāpadattayaṃ. Dantapoṇenacelakāti dantapoṇasikkhāpadañca acelakasikkhāpadañca. Uyyuttaṃ vase uyyodhīti uyyuttaṃ senaṃ dassanāya gaccheyya senāya vaseyya uyyodhikaṃ vā .pe. Anīkadassanaṃ vā gaccheyyāti vuttasikkhāpadattayaṃ. Surā orena nahāyanāti surāpānasikkhāpadañca orenaḍḍhamāsaṃ nahānasikkhāpadañca. Dubbaṇṇe dve desanikāti tiṇṇaṃ dubbaṇṇakaraṇānanti vuttasikkhāpadañca vuttāvasesaṃ pāṭidesanīyadvayañca. Lasuṇuttiṭṭhe naccanāti lasuṇasikkhāpadañca bhikkhussa bhuñjantassa pānīyena vā vidhūpanena vā upatiṭṭheyyāti vuttasikkhāpadañca naccaṃ vā gītaṃ vā vāditaṃ vā dassanāya gaccheyyāti vuttasikkhāpadañca. Ito paraṃ pāliṃ virajjhitvā likhanti. Yathā pana atthaṃ vaṇṇayāma evamettha anukkamo veditabbo. Nahānaṃ attharaṇaṃ seyyāti naggā nahāyeyyuṃ ekattharaṇapāpuraṇā tuvaṭṭeyyuṃ ekamañce tuvaṭṭeyyunti vuttasikkhāpadattayaṃ. Antoraṭṭhe tathā bahīti antoraṭṭhe sāsaṅkasammate tiroraṭṭhe sāsaṅkasammateti vuttasikkhāpadadvayaṃ. Antovassaṃ cittāgāranti antovassaṃ cārikaṃ pakkameyya rājāgāraṃ vā cittāgāraṃ vā .pe. Pokkharaṇiṃ vā dassanāya gaccheyyāti ca vuttasikkhāpadadvayaṃ. Āsandi suttakantanāti āsandiṃ vā pallaṅkaṃ Vā paribhuñjeyya suttaṃ kanteyyāti vuttasikkhāpadadvayaṃ. Veyyāvaccaṃ sahatthā cāti gihiveyyāvaccaṃ kareyya āgārikassa vā paribbājakassa vā paribbājikāya vā sahatthā khādanīyaṃ vā bhojanīyaṃ vā dadeyyāti vuttasikkhāpadadvayaṃ. Abhikkhukāvāsena cāti abhikkhuke āvāse vassaṃ vaseyyāti idametaṃ sandhāya vuttaṃ. Chattaṃ yānañca saṅghāṇinti chattupāhanaṃ dhāreyya yānena yāyeyya saṅghāṇiṃ dhāreyyāti vuttasikkhāpadattayaṃ. Alaṅkāraṃ gandhavāsitanti itthālaṅkāraṃ dhāreyya gandhavaṇṇakena nahāyeyya vāsitakena piññākena nahāyeyyāti vuttasikkhāpadattayaṃ. Bhikkhunītiādinā bhikkhuniyā ummaddāpeyyātiādīni cattāra sikkhāpadāni vuttāni. Asaṅkacchikā āpattīti asaṅkacchikā gāmaṃ paviseyya pācittiyanti evaṃ vuttā āpatti. Cattārīsā catuttarīti etāni sabbāni catucattāḷīsa sikkhāpadāni. Kāyena na vācācittena kāyacittena na vācatoti kāyena ceva kāyacittena ca samuṭṭhahanti na vācācittena na vācatoti attho. Dvisamuṭṭhānikā sabbe samā eḷakalomakāti idaṃ uttānatthameva.