{264} Padaññatra asammatāti padaso dhammaṃ mātugāmassa uttariṃ chappañcavācāhi dhammaṃ deseyya aññatra viññunā purisaviggahena asammato bhikkhuniyo ovadeyyāti vuttasikkhāpadattayaṃ. Tathā atthaṅgatena cāti atthaṅgate suriye ovadeyyāti idametaṃ sandhāya vuttaṃ. Tiracchānavijjā dveti tiracchānavijjaṃ pariyāpuṇeyya Tiracchānavijjaṃ vāceyyāti evaṃ vuttasikkhāpadadvayaṃ. Anokāse ca pucchanāti anokāsakatabhikkhuṃ pañhaṃ puccheyyāti idametaṃ sandhāya vuttaṃ.

{265} Addhānanāvaṃ paṇītanti bhikkhuniyā saddhiṃ saṃvidhāya ekaddhānamaggaṃ paṭipajjeyya ekaṃ nāvaṃ abhirūheyya paṇītabhojanāni agilāno attano atthāya viññāpetvā bhuñjeyyāti vuttasikkhāpadattayaṃ. Mātugāmena saṅghareti mātugāmena saddhiṃ saṃvidhāya gamanañca sambādhe lomaṃ saṃhareyyāti vuttasikkhāpadañca. Dhaññaṃ nimantitā cevāti dhaññaṃ viññāpetvā vāti ca nimantitā vā pavāritā vā khādanīyaṃ vā bhojanīyaṃ vā khādeyya vā bhuñjeyya vāti vuttasikkhāpadañca. Aṭṭha cāti bhikkhunīnaṃ vuttā aṭṭha pāṭidesanīyā.

{266} Theyyasatthaṃ upassutīti theyyasatthena saddhiṃ saṃvidhāya ekaddhānamaggagamanañca upassutiṃ tiṭṭhanañca. Sūpaviññāpanena cāti idaṃ sūpodanaviññattiṃ sandhāya vuttaṃ. Ratti channañca okāsanti rattandhakāre appadīpe paṭicchanne okāse ajjhokāse purisena saddhinti evaṃ vuttasikkhāpadattayaṃ. Byūhena sattamāti idaṃ tadanantarameva rathikāya vā byūhe vā purisena saddhinti āgatasikkhāpadaṃ sandhāya vuttaṃ.

{267} Dhammadesanasamuṭṭhānāni ekādasa uttānāneva. Evaṃ tāva sambhinnasamuṭṭhānaṃ veditabbaṃ. Niyatasamuṭṭhānaṃ pana tividhaṃ taṃ ekekasseva sikkhāpadassa hoti taṃ visuṃyeva dassetuṃ bhūtaṃ kāyena Jāyatītiādi vuttaṃ. Taṃ uttānameva. Nettidhammānulomikanti vinayapālidhammassa anulomanti.