saṅgahaṃ yo samārūḷho tassa pubbāgataṃ nayaṃ

hitvādāni karissāmi anuttānatthavaṇṇanaṃ.

Ubhatovibhaṅge soḷasamahāvāravaṇṇanā

{1} tattha yantena bhagavatā .pe. Paññattantiādinayappavattāya tāva pucchāya ayaṃ saṅkhepattho yo so bhagavā sāsanassa ciraṭṭhitikatthaṃ dhammasenāpatinā saddhammagāravabahumānavegasamussitaṃ añjaliṃ sirasi patiṭṭhapetvā yācito dasa atthavase paṭicca vinayapaññattiṃ paññapesi. Tena bhagavatā tassa tassa sikkhāpadassa paññattikālaṃ jānatā tassā tassā sikkhāpadapaññattiyā dasa atthavase passatā apica pubbenivāsādīhi jānatā dibbena cakkhunā passatā tīhi vijjāhi chahi vāpana abhiññāhi jānatā sabbattha appaṭihatena samantacakkhunā passatā sabbadhammajānanasamatthāya paññāya jānatā sabbasattānaṃ cakkhuvisayātītāni tirokuḍḍādigatāni cāpi rūpāni ativisuddhena maṃsacakkhunā passatā attahitasādhikāya samādhipadaṭṭhānāya Paṭivedhapaññāya jānatā parahitasādhikāya karuṇāpadaṭṭhānāya desanāpaññāya passatā arahatā sammāsambuddhena yaṃ paṭhamaṃ pārājikaṃ paññattaṃ taṃ kattha paññattaṃ kaṃ ārabbha paññattaṃ kismiṃ vatthusmiṃ paññattaṃ atthi tattha paññatti .pe. Kenābhaṭanti.