Buddhe agāravotiādisu yo buddhe dharamāne upaṭṭhānaṃ na gacchati parinibbute cetiyaṭṭhānaṃ bodhiṭṭhānaṃ na gacchati cetiyaṃ vā bodhiṃ vā na vandati cetiyaṅgaṇe sachatto saupāhano ca carati natthetassa buddhe gāravoti veditabbo. Yo pana sakkontoyeva dhammassavanaṃ na gacchati sarabhaññaṃ na bhaṇati dhammakathaṃ na katheti dhammassavanaggaṃ bhinditvā gacchati vikkhitto vā anādaro vā nisīdati natthetassa dhamme gāravo. Yo theranavamajjhimesu cittikāraṃ na paccupaṭṭhapeti uposathāgāravitakkamāḷakādīsu kāyapāgabbhiyaṃ dasseti yathāvuḍḍhaṃ na vandati natthetassa saṅghe gāravo. Tisso sikkhā samādāya asikkhamānoyeva pana sikkhāya agāravoti veditabbo. Pamāde ca sativippavāse tiṭṭhamānoyeva appamādalakkhaṇaṃ abrūhayamāno appamāde agāravoti veditabbo. Tathā āmisapaṭisanthāraṃ dhammapaṭisanthāranti imaṃ duvidhaṃ paṭisanthāraṃ akarontoyeva paṭisanthāre agāravoti veditabbo. Gāravaniddese vuttavipariyāyena attho veditabbo.

{272} Vivādamūlaniddese. Sattharipi agāravotiādīnaṃ buddhe agāravādīsu vuttanayeneva attho veditabbo. Appaṭissoti anīcavutti na satthāraṃ jeṭṭhakaṃ katvā viharati. Ajjhattaṃ vāti attano santāne vā attano pakkhe vā sakāya parisāyāti attho. Bahiddhā vāti parasantāne vā parapakkhe vā. Tattha tumheti tasmiṃ ajjhattabahiddhābhede saparasantāne vā saparaparisāya vā. Pahānāya vāyameyyāthāti mettābhāvanādīhi nayehi pahānatthaṃ vāyameyyātha. Mettābhāvanādinayena hi taṃ ajjhattaṃpi bahiddhāpi pahiyyati. Anavassavāyāti appavattibhāvāya. Sandiṭṭhiparāmāsīti sakameva diṭṭhiṃ parāmasati yaṃ attanā diṭṭhaṃ taṃ idameva saccanti gaṇhāti. Ādhānagāhīti daḷhagāhī.

{273} Anuvādamūlaniddeso kiñcāpi vivādamūlaniddeseneva samāno. Athakho aṭṭhārasa bhedakaravatthūni nissāya vivadantānaṃ kodhūpanāhādayo vivādamūlāni. Tathā vivadantā pana sīlavipattiādīsu aññataraṃ vipattiṃ āpajjitvā asuko nāma bhikkhu asukaṃ nāma vipattiṃ āpannoti vā pārājikaṃ āpannosi saṅghādisesaṃ āpannosīti vā Anuvadanti. Evaṃ anuvadantānaṃ kodhūpanāhādayo anuvādamūlānīti ayamettha viseso.