Attanā vā attānaṃ nānāsaṃvāsakaṃ karotīti ekasīmāyaṃ dvīsu saṅghesu nisinnesu ekasmiṃ pakkhe nisīditvā parapakkhassa laddhiṃ gaṇhanto yasmiṃ pakkhe nisinno tesaṃ attanā vā attānaṃ nānāsaṃvāsakaṃ karoti nāma. Yesaṃ santike nisinno tesaṃ gaṇapūrako hutvāpi kammaṃ kopeti itaresaṃ hatthapāsaṃ anāgatattā. Samānasaṃvāsakepi eseva nayo. Yesaṃ hi so laddhiṃ roceti tesaṃ samānasaṃvāsako hoti. Itaresaṃ nānāsaṃvāsako.

Satta āpattiyo satta āpattikkhandhāti āpajjitabbato āpattiyo rāsatthena khandhāti evaṃ dveyeva nāmāni hontīti nāmavasena dukaṃ dassitaṃ. Kammena vā salākagāhena vāti ettha Uddeso ceva kammañca ekaṃ. Vohāro ceva anussāvanā ca salākagāho ca ekaṃ. Vohārānussāvanasalākagāhā pubbabhāgā. Kammañceva uddeso ca pamāṇaṃ.

Addhānahīno nāma onavīsativasso. Aṅgahīno nāma hatthacchinnādibhedo. Vatthuvipanno nāma paṇḍako tiracchānagato ubhatobyañjanako ca. Avasesā theyyasaṃvāsakādayo aṭṭha abhabbapuggalā karaṇadukkaṭakā nāma. Dukkaṭakiriyā dukkaṭakammā. Imasmiṃyeva attabhāve katena attano kammena abhabbaṭṭhānaṃ pattāti attho. Aparipūro nāma aparipuṇṇapattacīvaro. No ca yācati nāma upasampadaṃ na yācati. Alajjissa ca bālassa cāti alajjī sacepi tipiṭako hoti bālo ca sacepi saṭṭhivasso hoti ubhopi nissāya na vattabbaṃ. Bālassa ca lajjissa ca yācatīti ettha. Bālassa tvaṃ nissayaṃ gaṇhāhīti āṇāyapi nissayo dātabbo. Lajjissa pana yācantasseva. Sātisāranti sadosaṃ yaṃ ajjhācaranto āpattiṃ āpajjati.

Kāyena paṭikkosanā nāma hatthavikārādīhi paṭikkosanā. Kāyena vā paṭijānātīti hatthavikārādīhi paṭijānāti. Upaghātikā nāma upaghātā. Sikkhūpaghātikā nāma sikkhūpaghāto. Bhogūpaghātikā nāma paribhogūpaghāto. Tattha tisso sikkhā asikkhato sikkhūpaghātikā veditabbā. Saṅghikaṃ vā puggalikaṃ vā dupaparibhogaṃ bhuñjato bhogūpaghātikā veditabbā.