Ādiyantacatukke. Pādaṃ vā atirekapādaṃ vā sahatthā ādiyanto garukaṃ āpajjati. Ūnakapādaṃ gaṇhāhīti āṇattiyā aññaṃ payojento lahukaṃ āpajjati. Etena nayena sesapadattiyaṃ veditabbaṃ. Abhivādanārahacatukke. Bhikkhunīnaṃ tāva bhattagge navamabhikkhunito paṭṭhāya upajjhāyāpi abhivādanārahā no paccupaṭṭhānārahā. Avisesena ca vippakatabhojanassa bhikkhussa yo Koci vuḍḍhataro. Saṭṭhivassassāpi pārivāsikassa samīpaṃ gato tadahupasampannopi paccupaṭṭhānāraho no abhivādanāraho. Appaṭikkhittesu ṭhānesu vuḍḍho navakassa abhivādanāraho ceva paccupaṭṭhānāraho ca. Navako pana vuḍḍhassa neva abhivādanāraho na paccupaṭṭhānāraho. Āsanārahacatukkassa paṭhamapadaṃ purimacatukke dutiyapadena dutiyapadañca paṭhamapadena atthato sadisaṃ.

Kālacatukke. Pavāretvā bhuñjanto kāle āpajjati no vikāle. Vikālabhojanāpattiṃ vikāle āpajjati no kāle. Sesaṃ kāle ceva vikāle ca. Asādhāraṇaṃ neva kāle no vikāle. Paṭiggahitacatukke. Purebhattaṃ paṭiggahitāmisaṃ kāle kappati no vikāle. Pānakaṃ vikāle kappati punadivasamhi no kāle. Sattāhakālikaṃ yāvajīvikaṃ kāle ceva kappati vikāle ca. Attano attano kālātītaṃ yāvakālikādittayaṃ akappiyamaṃsauggahitaka- paṭiggahitakañca neva kāle kappati no vikāle. Paccantimacatukke. Samudde sīmaṃ bandhanto paccantimesu janapadesu āpajjati no majjhimesu. Pañcavaggena gaṇena upasampādento gaṇaṅgaṇupāhanadhuvanahānacammattharaṇāni ca majjhimesu janapadesu āpajjati no paccantimesu. Imāni cattāri idha na kappantīti vadantopi paccantimesu āpajjati. Idha kappantīti vadanto pana majjhimesu āpajjati. Sesāpattiṃ ubhayatthāpi āpajjati. Asādhāraṇaṃ na katthaci āpajjati. Dutiyacatukke. Pañcavaggena gaṇena Upasampadādicatubbidhaṃpi vatthu paccantimesu janapadesu kappati. Idaṃ kappatīti dīpetuṃpi tattheva kappati no majjhimesu. Idaṃ na kappatīti dīpetuṃ pana majjhimesu janapadesu kappati no paccantimesu. Sesaṃ anujānāmi bhikkhave pañca loṇānītiādi anuññātaṃ. Taṃ ubhayattha kappati. Yaṃ pana akappiyanti paṭikkhittaṃ taṃ ubhayatthāpi na kappati. Antoādicatukke. Anūpakhajjaseyyādiṃ anto āpajjati no bahi. Ajjhokāse saṅghikamañcādīni nikkhipitvā pakkamanto bahi āpajjati no anto. Sesaṃ anto ceva bahi ca. Asādhāraṇaṃ neva anto na bahi. Antosīmādicatukke. Āgantuko vattaṃ na pūrento anto sīmāya āpajjati. Gamiyo bahi sīmāya. Musāvādādiṃ anto sīmāya ca bahi sīmāya ca āpajjati. Asādhāraṇaṃ na katthaci. Gāmacatukke. Antaragharapaṭisaṃyuttaṃ sekhapaññattiṃ gāme āpajjati no araññe. Bhikkhunī aruṇaṃ uṭṭhāpayamānā araññe āpajjati no gāme. Musāvādādiṃ gāme ceva āpajjati araññe ca. Asādhāraṇaṃ na katthaci.