Cattāro pubbakiccāti sammajjanī padīpo ca udakaṃ āsanena cāti idaṃ catubbidhaṃ pubbakaraṇanti vuccatīti vuttaṃ. Chandapārisuddhi utukkhānaṃ bhikkhugaṇanā ca ovādoti ime pana cattāro pubbakiccāti veditabbā. Cattāro pattakallāti uposatho yāvatikā ca bhikkhū kammappattā te āgatā honti sabhāgāpattiyo na vijjanti Vajjanīyā ca puggalā tasmiṃ na honti pattakallanti vuccatīti. Cattāri anaññapācittiyānīti etadeva paccayaṃ karitvā anaññaṃ pācittiyanti evaṃ vuttāni anūpakhajjaseyyākappanasikkhāpadaṃ ehāvuso gāmaṃ vā nigamaṃ vāti sikkhāpadaṃ sañcicca kukkuccaupadahanaṃ upassutitiṭṭhananti imāni cattāri. Catasso bhikkhusammatiyoti ekarattaṃpi ce bhikkhu ticīvarena vippavaseyya aññatra bhikkhusammatiyā aññaṃ navaṃ santhataṃ kārāpeyya aññatra bhikkhusammatiyā tato ce uttariṃ vippavaseyya aññatra bhikkhusammatiyā duṭṭhullaṃ āpattiṃ anupasampannassa āroceyya aññatra bhikkhusammatiyāti evaṃ āgatā terasasammatīhi vimuttā aññatra sammatiyo.

Gilānacatukke. Aññabhesajjena karaṇīye lolatāya aññaṃ viññāpento gilāno āpajjati. Abhesajjena karaṇīye bhesajjaṃ viññāpento agilāno āpajjati. Musāvādādiṃ ubhopi. Asādhāraṇaṃ ubhopi nāpajjanti. Sesaṃ sabbattha uttānamevāti.

Catukka vaṇṇanā niṭṭhitā.